Гуманитар йөк төягән чираттагы машина махсус операция зонасына кузгалды

“Патриоты Родины” хәрәкәте җитәкчесе, махсус хәрби операция зонасындагы хәрбиләргә  гуманитар ярдәм җыю һәм илтеп бирү буенча Казан волонтерлары төркеме эшен җайга салучы Булат Газизов чираттагы тапкыр Донбасска киткән.

Бу юлы ул Татарстаннан мобилизацияләнгән бик күп ир-егетләрнең хезмәт итү урыннарында – Донецк, Лисичанск һәм Сватовада булырга җыена. Йөк, гадәттәгечә берничә иҗтимагый төркем һәм оешмалар ярдәмендә җыелган.
Казанның  Мәрҗани мәчетеннәән алгы сызыктагы солдатларга мәчеткә йөрүче хатын-кызлар үргән 22 маскировка челтәрен, 60 пар кышкы җылы аяк киеме, бик күп эчке кием, ит һәм балык консервларын җыелган. Лисичанск шәһәрендә яшәүчеләргә Мәрҗани мәчетеннән яңа кием-салым, медицина ихтыяҗлары өчен кирәкле материаллар тапшырылачак.

Шулай ук Татарстан Профсоюзлар федерациясе (рәисе – Елена Кузьмичева)_гуманитар ярдәм юллаган. Профсоюзлар Донецк һәм Лисичанск өчен мәктәп кирәк-яраклары, медикаментлар әзерләгән.
Казанның 80 нче мәктәбе Лисичанск шәһәре мәктәпләрендә укучылар өчен гуманитар ярдәм җыйган.
Казан төзелеш көллияте  укучылары солдат мунчалары өчен берничә мич ясаган.

Мамадыш районында яшәүчеләр дә махсус операция зонасындагыларга ярдәм итүгә үзеннән өлеш керткән. “Чулпан” авыл хуҗалыгы кулланучылар кооперативы рәисе Фирназ Хисмәтов солдатларыбызга күп кенә ит ризыклары җибәргән. Усали авыл җирлегендә яшәүчеләр хәрбиләргә җылы оекбашлар бәйләгән. Татарстанның Биологик ресурслар буенча дәүләт комитеты солдатларга үзенчәлекле күчтәнәч әзерләгән. Ведомство инспекторлары Эмиль Гаязов һәм Виталий Кутузов хәрбиләргә ярты тонна кабан дуңгызы ите җибәргән.

Ә инде Казанда яшәүче Тимур Мостафин солдатларга “Шевроле-Нива” машинасын бүләк иткән. Машина гуманитар ярдәм белән бергә алгы сызыкка китереләчәк. Ниһаять, Казан волонтерлары үтә нык 20 бронежилет сатып алуга зур гына күләмдә акча җыюга ирешкән. Бронежилетлар да алгы сызыкка юллана.