Ватаныңа хыянәт итәсең! Соңгы арада мошенниклар, үзләрен ФСБ хезмәткәрләре дип таныштырып, кешеләрне Украина армиясенә акча күчерүдә гаепли икән. Бу хакта Саклык банкы кисәтә.
Халыкны төп башына утыртуның яңа тәртибе болайрак: мошенниклар банк клиентларына шалтыратып, үзләрен ФСБ хезмәткәре дип таныштыра. Шуннан соң аларның исеменнән Украина армиясенә акча күчерелүе турында хәбәр итә. Имеш, банк хезмәткәрләре, клиентларының шәхси мәгълүматларын урлап, алар исеменнән акча күчереп ята. Алай гына да түгел, кырыгалдарлар, тиз арада ни дә булса эшләмәсәгез, җинаять җаваплылыгына тартылачаксыз, дип ышандыра. Моны булдырмас өчен, алданучыны «куркынычсызлык хезмәте»нә кушылып, карталарындагы акчаны алар счетына күчерергә мәҗбүр итәләр икән.
– Нәтиҗәдә мошенниклар «корбаны» аларга үз акчасын күчереп кенә калмый, ә, паникага бирелеп, кредитлар ала һәм ул акчаны да мошенникларга күчерә, – ди Саклык банкы идарәсе рәисе урынбасары Станислав Кузнецов.
Тагын бер кат искәртсәк, зыяны тимәс: банк хезмәткәрләре беркайчан да клиентларының шәхси мәгълүматларын сорап, йә булмаса, акчагызны югалтырга мөмкинсез, дип, куркытып шалтыратмый; алар клиентның банк картасы номерларын, смс аша килгән парольләр дә сорамый. Игътибарлы һәм сак булыйк!
Шушы арада гына бер алдау юлы турында билгеле булды. Чаллыда яшәүче ханым шуның аркасында 180 мең сум акчасыннан колак каккан. Татарстан буенча Эчке эшләр министрлыгының рәсми сайтындагы мәгълүматтан күренгәнчә, башта аңа бары тик интернет кибеттә «лайк»лар куеп, «товар сатарга» гына кушкан булалар. Имеш, «лайк» куеп, теге яисә бу товарны хупларга кирәк. Ялган менеджерлар биремнәрен социаль челтәрләр аша сылтама рәвешендә җибәрә торган, ә бу ханым барысын да җиренә җиткереп үти барган.
Шуннан соң аңа, имештер, теге яки бу товарга ихтыяҗны арттыру өчен, товарларны ялганлап кына сатып алырга тәкъдим иткәннәр. Товарга тотылган акчасының арттырылган күләмдә үз счетына кире кайтарылачагын әйткәннәр. Шулай итә-итә, ул 180 мең сумнан артык акчага товар сатып алган. Әмма аңа акчасын да, «эшләп тапкан» керемен дә җибәрүче булмаган. Кырыгалдарлар корбаны булганын белүгә, Чаллыда яшәүче бу ханым полиция хезмәткәрләренә мөрәҗәгать иткән.
