11 миллиард сум. «Куркынычсыз һәм имин юллар» илкүләм проекты буенча быел Татарстан юлларына әнә шул кадәр акча бүлеп биреләчәк. Ел азагына кадәр республикадагы 31 күперне рәткә китерәчәкләр. Быел кайсы юлларның сыйфаты яхшырачак? Бу сорауга җавап бар.
– Агымдагы елда Татарстанда юл эшләре программасына барлыгы 48,5 миллиард сум акча каралган. Шул исәптән, 32,4 миллиард сум – республика бюджетыннан, 16,1 миллиард сум федераль казнадан бүлеп биреләчәк, – дип сөйләде «Татар-информ» агентлыгында узган матбугат очрашуында Татарстан транспорт һәм юл хуҗалыгы министры уранбасары Артем Чукин. – Республика аша узучы федераль юлларда «М7» трассасын төзекләндерү, Түбән Кама һәм Чаллы юлларын уратып узу юлын салу кебек эшләр дә дәвам иттереләчәк.
Аерым алганда, юл төзелешенә – 3 миллиард, капиталь төзекләндерүгә – 6,6 миллиард, юлларны карап торуга 7,8 миллиард сумга якын акча «түшәячәкләр». Быел «Куркынычсыз һәм имин юллар» проектын тормышка ашыруга 11,2 миллиард сум акча бүлеп биреләчәк. Шартлы итеп әйтсәк, эш дүрт юнәлештә алып барылачак.
– Казан агломерациясендә 37 чакрым юл төзекләндереләчәк, – диде министр урынбасары. – Шул исәптән, Казанның Коләхмәтов, Хәсән Туфан, Ленинград кебек урамнарында 10 чакрымга якын юлны тиешле таләпләргә туры китереп төзекләндерү күздә тотыла. Агломерация эчендәге Казан – Шәмәрдән, Столбище – Атабай кебек төбәк дәрәҗәсендәге юллар да тәртипкә китереләчәк.
Чаллы агломерациясендә «Куркынычсыз һәм имин юллар» проекты кысасында, юл эшләренә 1,4 миллиард сум акча тотылачак, дип фаразлана. Аерым алганда, автокаланың Хәсән Туфан, Вахитов, Сөембикә проспектларын яңартырга җыеналар. Ел азагына Казан һәм Чаллы юлларының норматив торышы 84 процентка җитәргә тиеш. Түбән Кама агломерациясендә әлеге күрсәткеч бераз түбәнрәк – 78 процент. Биредә быел 480 миллион сумлык эш башкарырга ниятлиләр.
Эшнең тагын бер юнәлеше – быел төбәк дәрәҗәсендәге 222 чакрымга якын юл төзекләндереләчәк. Мәсәлән, Азеево – Чирмешән – Шентала, Чистай – Түбән Кама, Апас – Тәтеш юлларында йөрүчеләр җиңел сулап куячак. Биредә юлларны ялт иттерәчәкләр.
Юлчылар күперләрне дә уратып узмый. Ел азагына кадәр республикада 31 күперне рәткә китерәчәкләр. Бу җәһәттән генә дә ике чакрымга якын юл яңартылачак. Аерым алганда, Әлмәт районында Дала Зәе елгасы аша салынган күпердә ремонт эшләре төгәлләнәчәк. Чирмешәндә Зур Чирмешән елгасы аша салынган күпер дә яңа сулыш алачак. Балык Бистәсендә исә Шомбыт елгасы аша салынган күпер яңартылачак.
Ә менә Казанда Вознесение тракты төзелешенә әле шактый акча кирәк. Бу хакта шәһәр башкарма комитетының тышкы төзекләндерү комитеты җитәкчесе урынбасары Эдуард Вафин сөйләде.
– Әлеге төзелешнең беренче чиратында Гвардия урамыннан алып Җиңү проспектына кадәр юл салыначак. 2021–2022 елларда бу эшкә 11,5 миллиард сум акча тотылды. Эшнең беренче чиратын ел азагына кадәр бетерәчәкбез. Юлчылар көннәр бераз корытканны гына көтә. Төзелешнең икенче чиратына килгәндә, аның бәясе 26 миллиард сум тәшкил итә. Былтыр әлеге максаттан 5 миллиард сумлык эш башкарылды, быел 3,5 миллиард сум бүлеп бирелгән. Барлык эшләр дә 2024 ел азагына кадәр тәмамланачак дип көтелә. Тик барысы да финанслауга бәйле, – диде ул.
Добойка
Илкүләм проектлар, шул исәптән, «Куркынычсыз һәм имин юллар» проекты Россия Президенты Владимир Путин тәкъдиме белән 2019 елдан бирле тормышка ашырыла. Моңа кадәр, 2017–2018 елларда, илнең кайбер төбәкләрендә «Куркынычсыз һәм имин юллар» өстенлекле федераль проекты гамәлдә иде.
Эльвира Вәлиева
