«Безнең бурыч – һөнәрнең абруен күтәрү генә түгел, ә алга таба һөнәрне сайларлык сәләтле яшьләребезне җәлеп итү». «Татар-информ»да узган матбугат очрашуында Укытучы һәм остаз елында КФУның Филология һәм мәдәниятара багланышлар институтында узачак чаралар турында сөйләделәр.
– Укытучы һәм остаз елы бик кызыклы һәм төрле чараларга бай булачак. Безнең өчен ул чираттагы юбилейга – университетка нигез салынуга 220 ел тулуга әзерлек елы да булып тора, – диде Казан федераль университетының Филология һәм мәдәниятара багланышлар институты директоры Рәдиф Җамалетдинов.
Татарстан Мәгариф һәм фән министрлыгында өстәмә һөнәри белем бирүне үстерү бүлеге башлыгы Роза Шәяхмәтова Укытучы һәм остаз елының бурычларын искәртеп үтте.
– Безнең бурыч – укытучы һөнәренең абруен күтәрү генә түгел, ә алга таба бу һөнәрне сайларлык сәләтле яшьләребезне җәлеп итү, – диде ул.
Чараларның үзләренә күчик. 28 март Казанда «Учителем быть – круто!» республика психологик-педагогик сыйныфлар слеты узачак. Роза Шәяхмәтова әйтүенчә, республикада психологик-педагогик юнәлештәге сыйныфлар үсеш ала. Уку елы башыннан бирле 150 мәктәптә 180 шундый сыйныф ачылган. Аларда 3500 бала укый, 200дән артык сыйныф җитәкчесе эшли. Әлеге юнәлештәге сыйныфлар педагогик кадрлар әзерләүче югары уку йортларына беркетелгән. Бу – КФУ һәм аның филиаллары, республиканың 6 педагогик көллияте.
Институтның Казан халыкара лингвистика үзәге мөдире Светлана Царева сүзләренә караганда, педагогик сыйныфлар балага һөнәр буенча эшләргә теләү-теләмәвен аңлар өчен кирәк.
– Билгеле, аларның барысы да укытучы булып эшләмәячәк. Бу сыйныфлар аларга үзләрен укытучы ролендә яхшырак хис итәргә мөмкинлек бирә, – ди Светлана Царева.
Шулай ук, КФУ базасында 8 нче тапкыр Н.И. Лобачевский исемендәге Бөтенроссия фәнни конференциясе узачак. Рәдиф Җамалетдинов фикеренчә, бу – бик кирәкле һәм актуаль чара. Анда илнең барлык төбәкләреннән дә укучылар катнаша.
– Безнең институт җитәкли торган бүлеккә һәрвакыт ихтыяҗ зур. Иң күп катнашучылар да – безнең булачак филологлар, – диде институт директоры.
Абитуриентлар өчен дә чаралар планлаштырылган. Март ахырында, мәктәп укучыларының каникулы чорында, балалар белән әти-әниләрне һөнәри юнәлеш бирүче дәресләргә һәм лекцияләргә чакыралар.
– Без инде күптән «Ачык ишекләр көне» форматыннан читкә киттек. «Ачык ишекләр елы» форматында эшлибез. Һәр көн саен диярлек безнең институтка экскурсиягә, чараларга киләләр, ачык лекцияләр тыңлыйлар. Сан күрсәткечләрен түгел, сыйфатны яхшырту мәсьәләсен хәл итәбез. Ел саен безгә БДИ буенча йөзәр балл җыючылар, олимпиада җиңүчеләре килә. Минемчә, моңа нәкъ менә без үткәргән чаралар ярдәм итә, – диде Светлана Царева.
Ләйсән Сафина
