Татарстан Республикасы Рәисе Рөстәм Миңнехановның Каравон рус халык бәйрәмен уздыру уңаеннан
МӨРӘҖӘГАТЕ
Хөрмәтле татарстанлылар!
Сезне рус халык бәйрәме – Каравон уңаеннан ихлас тәбрик итәм!
Кунакчыллыгы белән дан тоткан Лаеш җирендә бәйрәм тантаналары башлану турында беренче булып Никола храмы кыңгырауларының күңелле чыңлавы хәбәр бирә.
Игенченең зирәклегенә мәдхия, туган җир сулышын тою хисләре белән сугарылган борынгы Каравон хәзер дә үзенә генә хас рухи куәтен саклый һәм элеккечә безне рус традицион мәдәниятенең кабатланмас матурлыгы, җете төсләре белән сөендерүен дәвам итә.
Гүзәл табигатьнең тәэсирен, катнашучыларның йөрәк җылысын һәм җан аваздашлыгын көйле бер агымга берләштергән түгәрәк уен – Никольское авылындагы тантаналарның аерым бер мәгънәгә ия булган символы. Җырлы-биюле әйлән-бәйлән ерак чорлардан буыннан-буынга тапшырыла килгән күркәм гореф-гадәтләребез, тамырларыбыз белән ныклы бәйләнеш хисен тагын да көчәйтә.
Үзенчәлекле рус мәдәниятенең кыйммәтен аңлап, илебезнең төрле төбәкләреннән Каравонга килүчеләр саны арта бара. Бәйрәм мәйданында балаларның шатлыклы гөрләшүе тынмый, ярыш-бәйгеләрдә катнашучыларның кыюлыгы, чаялыгы, яшәү дәрте ташып тора. Яшь буынның уртак тарихи-мәдәни мирасыбыз белән кызыксынуы елдан-ел арту рухи җәүһәрләребезне саклау эшенә һәм күпмилләтле Татарстанның алгарышына бәрәкәтле этәргеч бирә.
2023 елда республикада игълан ителгән Милли мәдәниятләр һәм гореф-гадәтләр елында уздырылган чаралар да моңа ярдәм итәчәк. Бердәм булганда гына без, милли һәм дини аерымлыкларга карамастан, язмышыбыз һәм әхлакый хәзинәләребез уртаклыгын яхшы аңлаган хәлдә, тиңе булмаган тарихи-мәдәни мирасыбызны эчке егәр белән саклап калуга һәм барлык авырлыкларны да җиңеп чыгуга ирешәчәкбез.
Бәйрәмнең оештыручыларына, кунакларына, анда килгән һәркемгә күтәренке кәеф, нык сәламәтлек, бәхет һәм иминлек телим.
Киң мәйдан сиңа, Каравон!
Телеграмда безнең каналга кушылыгыз: https://t.me/vatantat