ТМТВ-2023: җырчы, блогер, спортчы – бар да бергә!

ТМТВ татар музыкаль телеканалы премиясен тапшыру тантанасы быел «Пирамида» концертлар залында үтте. Тамаша, күркәм гадәткә әйләнеп, быел сигезенче тапкыр оештырылды. Елның көтеп алынган мәдәни вакыйгасының быелгы үзенчәлеге нәрсәдә?

Кызыл келәм

Тамаша башланганчы, җырчылар, блогерлар һәм хәтта «Рубин» футболчысы Ленар Фәттахов, УНИКС баскетбол командасы уенчысы Иван Лазарев та традицион кызыл келәмнән узды. Артистлар үз киемнәре, гадәти булмаган чыгышлары белән шаккатырырга тырышты. Беренчеләрдән булып кызыл келәмгә ат җиккән карета килеп туктады. Ул автор-башкаручы Фирүзә булып чыкты. «Принцесса булу балачак хыялым иде һәм бүген, бер мизгелгә булса да, аны тормышка ашыра алдым», – диде ул.

Артистлар күбесенчә стилистлары белән әзерләнгән, әмма кайберәүләр образны тулысынча үзләре, үз зәвыгына туры китереп ясаткан булса кирәк. Әйтик, Татарстанның атказанган артисты Гөлназ Сәфәрова яисә танылган җырчы Дилә Нигъмәтуллина яшьләрчә, заманча киенгән. «Кызыл келәмгә эт белән чыгу идеясе барлыкка килгәч, мин шушы кыю образны күзалладым. Аны үзем интернетта, дизайнерлар арасында да эзләдем. Гомумән, бу образ – эчке халәтемнем бер ягы», – диде ул.

Стиль дигәндә, Гүзәлем һәм Салават Миңнехановлар турында да әйтеп үтми  булмас. Алар бер төстә киенеп, быел да кызлары Мәдинә белән бергә тантана кунаклары булды. Шушы зәвыклы гаилә белән бергә әхлаклы мода өлкәсендәге эксперт Җәннәт Минһаҗева да кызыл келәмнән узды.

Яшьләргә – юл!

ТМТВ премиясендә һаман да яңа исемнәр яңгырый. Тамашачы да шуңа ияләшә бара сыман. «Яңа йолдыз» җиңүчеләреннән тыш, биредә әле Нефтекамск егете Лев Кулушев, Элина Әхмәдуллина, автор-башкаручы Илгиз Шәйхразиев белән дуэт җырлаган 12 яшьлек Җәмилә Әсәдуллина, Альберт Вәлиуллин дигән яшь талантларның тавышы яңгырады. Күбесенең премиядә тәүге катнашулары.

Премия тапшыру тантанасының баш режиссеры Алмаз Гыйльметдинов быелгысы турында менә нәрсә ди:

– Безнең компания ел дәвамында татар мәдәнияте өчен күп әһәмиятле чаралар үткәрә. Әлеге премия шулай ук яшь буынга һәм яңа башкаручы артистларга ярдәм итүгә юнәлдерелгән. Шуңа күрә без жанр һәм кыю сәхнә куелышлары белән эксперимент ясарга тырышабыз. Безгә яшьләр өчен татар телендә кызыклы контент ясау мөһим.

Җырчы Гөлназ Асаева әлеге премияне инде өченче тапкыр ала. Ул да бу юлы яшьләрнең күп булуына игътибар итте. «Быелгы ТМТВ премиясенең үзенчәлеге яшь буын җырчыларына үзләрен күрсәтү өчен мөмкинлек бирүдә. Әле генә җырчы карьерасын башлый торган башкаручылар шактый. Аларның шундый зур концертта җырлавы һәм үзләрен күрсәтүе бик мөһим», – диде ул.

Гөлназ шушы тантанага нык әзерләнгәнен дә әйтте. Җырын да җентекләп сайлаган. «Саубуллашу»ны заманында Илһам Шакиров, Әлфия Авзалова, Хәния Фәрхи җырлаган. «Үземә шундый зур җаваплылык алып, бу җырны башкарырга булдым», – диде Асаева.

Радиодагы яңгыраш

Залда буш урыннар юк иде диярлек. Тамашачы артистларның чыгышларын алкышларга күмде. Әмма кызганычка, һәр артистның чыгышы халыкны сөендерде дип әйтергә тел әйләнми.

Әлбәттә, югары дәрәҗәдәге башкару сәләтен беркем дә таләп итми. Ә бәлки, кирәктер? Сүз «тере» тавыш белән җырлау турында бара. Татарстанның һәм Башкортстанның атказанган артисты, киң диапазонлы, алтын тавыш иясе Филүс Каһиров белән бер сәхнәгә чыгып, фонограммага җырлаучыларны сизмичә калмыйсың. Тамашачы аны гына аера ала. Артистларның эмоцияләре, хәрәкәте тавышка чыга. Ә менә нәкъ радиодагы кебек яңгыраш уйланырга урын калдыра.

Мәдәни вакыйганың быелгы үзенчәлегенә әйләнеп кайтыйк. Бу хакта танылган дуэт Алсу һәм Азат Фазлыевлар белән сөйләштек. Алар премияне инде алтынчы тапкыр ала.

– Елдан-ел сәхнә бизәлеше үзгәрә, бу бик тә ошый: гел затлы чыгышлар, экраннар, төрле сәхнә куелышлары. Гомумән, бу – бик җитди бәйрәм. Быел әле блогерларны да чакырганнар. Бу инде халыкка тагын да кызыклырак булсын өчендер. Быел тамашачы да икенче төрле: елы шундыймы, бәйрәмеме? Каршы алулары да, кызыл келәм дә – барысы да югары дәрәҗәдә, – диде гаилә дуэты.

Премиянең быелгы лауреатлары

  1. Марат Яруллин – Попурри
  2. Лев Кулушев – «Бер матур сүз»
  3. Элина Әхмәдуллина – «Елмай әле»
  4. Ләйсән Гыймаева һәм Булат Бәйрәмов – «Рәхәт яшәргә дөньяда»
  5. Роман Плеханов – «Ике ярда»
  6. Дилә Нигъмәтуллина – «Сурәт»
  7. Җәмилә Әсәдуллина һәм Илгиз Шәйхразиев – «Ташлама»
  8. Зәринә Асылкаева – «Уйлар»
  9. Шәрәпҗан – «Йөрәгем сикерә»
  10. Фирүзә – «Бер сүз»
  11. Давлян – «Учак янында»
  12. Салават Миңнеханов һәм Гүзәлем – «Әниемә»
  13. Эльмира Кәлимуллина – «Сүзем калды»
  14. Филүс Каһиров – «Балаларым»
  15. Газинур Фарукшин – «Йөрәк»
  16. Илнат Фәрхуллин – «Күбәләк
  17. Юлия һәм Иршат Нәбиевләр – «Гел бергә»
  18. Данир Сабиров – «Магнита»
  19. Шакур һәм Рената Тей – «Pink Floyd»
  20. Эльнара Ганиева – «Сөйгәннәрнең белик кадерен»
  21. Рәфинә Ганиуллина һәм Рәзил Камалов – «Җаным»
  22. Игорь Дмитриев – «Үкенмим» 23. Фәридә Ибраһимова – «Син бар»
  23. Алсу һәм Азат Фазлыевлар –- «Бие, бие бас кына»
  24. Альберт Вәлиуллин – «Араларга ятлар кермәсен»
  25. Гөлназ Асаева – «Саубуллашу»
  26. Зөлфирә һәм Алмаз Мирзаяновлар – «Өзеп ал»
  27. Илмира Нәгыймова – «Кочакладым»
  28. Рифат Зарипов – «Тәрәзәңдә ут сүнгән»
  29. Әнвәр Нургалиев – «Аңлат әле», «Сөйгән яр»

 Диана Карпова


Фикер өстәү