Ризыгы да, бәясе дә тәмле. Республикада авыл хуҗалыгы ярминкәләре башланды

Бу шимбә шәһәрләрдә көзге ярминкәләр башланды. Авыл уңганнары иртә таңнан сәүдә нокталарында сату итте. Елдагыча, быел да алар бәяләр, мул ризык һәм җыр-бию белән кинәндерә.

«Казан» агросәнәгать паркына Мамадыш, Арча, Кукмара уңганнары килде. Арчалылар халыкны кайнар коймак һәм тәмле чәй белән сыйлады. Алар сату иткән урында халык аеруча күп иде. Коймагыңны пешереп, чәеңне ясап кына өлгер!

– Төнге бердә йокыдан тордык. Иртәнге дүртенче яртыда без инде монда идек. Бишенче яртыда сатып алучылар килә башлады. Күбрәк олы яшьтәгеләр иде, – ди Югары Оры авылыннан килгән Рәмзия Сафиуллина. – Без башта сөт саттык. Иртәнге сигезенче яртыга 300 литр сөтебез бетте дә. Халык чират торып алды. Аннары сатып алучыларны коймак белән сыйладык. Самавыр кайнатып чәй ясадык. Октябрьдә тагын киләбез әле.

Ниләр генә юк монда! Арчалылар мунчалага кадәр сата. Мамадыш урман хуҗалыгы хезмәткәрләре агач үсентеләре алып килгән. Аларны да күз ачып йомганчы алып бетерделәр. Башкала халкы Кукмараның сөт ризыкларын да сыпыртып алды.

Кукмара районының Нырты авылында яшәүче Илшат Хамизов иртәнге тугызга алып килгән итен сатып та бетергән иде.

– Бәя узган елгы кебек калды. Килосы 460 сумнан башлана. Яңа гына суйган мал булгач, халык чират торып ала. Ярминкәләр безнең өчен бик әйбәт урын инде ул. Монда акча эшләп була. Казан халкы авыл ризыгының тәмен белде. Бик теләп алалар. Күп еллар ярминкәгә йөргәч, үз клиентларым да күп. Киләсемне көтеп торалар. Шөкер итеп, сөенеп кайтып китәбез, – ди Илшат.

Ярминкәләрнең тагын бер үзенчәлеге бар – биредә рәхәтләнеп үзешчәннәр чыгышын тыңлап була. Ә алар башкала артистларыннан бер дә ким түгел. Матур итеп баянга кушылып җырлыйлар. Арча районының Сарай Чокырча авылыннан килгән Марсель абый иртәдән бирле баян уйнап, җырлап торган. Үзе әйтүенчә, ярминкәгә килүчеләр дә аңа кушылып җырлаган.

– Кукмара, Саба, Арча, Биектау районнарында туып-үскән кешеләр белән аралаштым. Мин уйнадым, алар җырлады. Кешеләр монда ризык кына алып китми, рухи байлык та туплый, – ди ул.

Дөрес әйтә. Инде сумкалары тулган килеш тә кайтырга ашыкмаучы кешеләр шактый иде.

– Мин бу ярминкәне көтеп алам. Монда Кукмара сөтен алырга дип киләм. Аларның эремчеге дә тәмле, каймагы да, мае да. Алар килмәгәндә башка җирдән алдым. Әмма анда кыйммәт. Ярминкәнең бәясе дә «тешләми» бит аның. Менә шуңа рәхәтләнеп бар кирәк-яракны җыйдык та инде, – ди Мирхәйдәр Фәйзи урамында яшәүче Гөлфизә Саттарова.

Искәндәр Фәтхуллин икенче тапкыр килгән иде инде. Иртән улы белән килеп ике капчык бәрәңге, бер капчык суган, бер капчык кәбестә алып кайтканнар.

– Хатыным кәбестәне тозлап куя. Килосын 16 сумнан алдык. Хәтерләсәгез, берзаман кибеттә 60 сумнан да саттылар бит. Шулкадәр кыйммәткә алырга пенсионерның акчасы ничек җитсен?! Авыл хуҗалыгы хезмәтчәннәренә чиксез рәхмәт. Алар безне ашата, – ди Искәндәр абый. – Бәяләрнең күтәрелмәгәненә сөендек. Аннары бит инде, авылдан килгән ризык экологик яктан чистадыр дип тә ышанабыз. Мин күбрәк авыл җирлегеннән килүче шәхси бакчада үстерүчеләрдән алдым. Икенче атнага да чыгармын дип торам. Әйбер алмасам да, якташларым килмәсме дип урап кайтырга дип торам.

Сан

Көзге ярминкә һәр атнаның шимбәсендә 23 декабрьгә кадәр узачак. Татарстан Авыл хуҗалыгы һәм азык-төлек министрлыгы матбугат үзәге мәгълүматларына караганда, ярминкәләр Казанда – 14, Чаллыда һәм Яшел Үзәндә – 2, Түбән Камада 3 мәйданда үткәрелә. Республиканың 26 районында да оештырыла сәүдә.

Быелгы беренче ярминкәдә 16 районның авыл хуҗалыгы хезмәтчәннәре 78,2 миллион сумлык товар саткан. Шәһәр халкына 546,1 тонна яшелчә (шуның 385,3 тоннасы бәрәңге), 17,3 тонна сөт, 75,9 тонна ит (шуның 47 тоннасы сыерныкы) алып килгәннәр.

Гөлгенә ШИҺАПОВА

Фото: Илдар Мөхәммәтҗанов

Бәяләр

Ярминкәдә Кибеттә

Бәрәңге (кг) – 18 сум 30–50 сум

Кәбестә (кг) – 16 сум 30 сум

Агызып ала торган сөт (литры) – 40 сум

пакеттагы сөт (2,5 майлылык, 800 грамм ) – 45 сум

Кишер (кг) – 25 сум 30 сум

Чөгендер (кг) – 16 сум 24 сум

Суган (кг) – 22 сум 28 сум

Сыер ите (кг) – 460–480 сум 300 граммы – 270 сум