Татарстан мөфтие Камил хәзрәт Сәмигуллинның хәер-фатыйхасы белән Татарстан мәчетләрендә Фәләстыйн мөселманнары өчен җәмәгать белән дога кылачаклар. Бу хакта Татарстан Диния Нәзарәте матбугат хезмәте хәбәр итте.
Аллаһ Раббыбызга мөрәҗәгать итеп, дин кардәшләребез җирдә тынычлык урнашуын, кайгы-борчуларның тәмамлануын үтенеп сораячак. Бүген имамнар шулай ук Газзә хастаханәләрендә вафат булганнар рухына дога кылачак: атышлар нәтиҗәсендә йөзләгән гаепсез кешеләр үлде, алар арасында авырулар, хатын-кызлар, балалар һәм өлкәннәр бар.
Төп дога кылу чарасы Казанның Галиев мәчетендә үтәчәк.
“Кол Шәриф” мәчетендә Коръән хәтем кылына (Коръән тулысынча укыла), аннары бер гаепсез вафат булган палестиналыларның рухына дога кылыначак.
