Лениногорскида яшәүче бер хатын-кыз мошенникларның “Россия почтасы” хезмәткәрләре булып шалтыратуыннан соң 1,4 миллион сум акчасын югалткан. Аферистлар, имештер, аның исеменә килгән посылканы алу өчен смс-хәбәр белән җибәрелгән кодны әйтүен сораганнар.
Шуннан соң аларга хокук саклау органнары хезмәткәрләре исеменнән шалтырата башлаганнар. “Полиция хезмәткәрләре” хатын-кызны, янәсе, аферистлар счетыгызга керергә әзерләнә, алардан саклану өчен барлык акчагызны “куркыныч янамый торган счетка” күчерергә кирәк, дип куркыткан.
Хатын-кыз, үзенең саклык акчасы булмаганлыктан, әтисенекен “куркынычтан” саклаган – ниндидер реквизитларга 1,4 миллион сум күчереп куйган.
Берничә көн узгач кына мошенниклар корбанына әйләнүен аңлап, полициягә мөрәҗәгать иткән. “Мошенниклык” статьясы буенча җинаять эше кузгатылган.
Телеграмда безнең каналга кушылыгыз: https://t.me/vatantat