Бүген Татарстан Рәисе 68 яшен билгеләп үтә. Аның халык телендә булган фикерләрен искә төшерәбез.
Рөстәм Миңнеханов – төбәкне социаль, икътисадый һәм мәдәни үсешнең яңа дәрәҗәсенә чыгарган лидер. Ул үз фикерләре-хисләрен беркайчан да яшерми, сүзләре үткенлеге белән дә аерылып тора.
«Сөйләгәнеңне эшләп күрсәт!»
2023 елның 17 февралендә республиканың Икътисад министрлыгында федераль җитәкчеләр катнашында коллегия узды. Сәнәгать парклары, резидентлар, аларны җәлеп итү турында фикер алыштылар. Ул вакытта республика башлыгы инвестиция-венчур фонды директоры Айнур Айделдиновка мөрәҗәгать итте.
– Айнур, сөйләдең, сөйләдең, сөйләгәнеңне эшләп күрсәт, – диде.
“Моның өчен дөрес санарга, фаразларга кирәк”
Татарстан казначылык департаменты директоры Марат Фәйзрахманов 2016 елда Татарстанның сатып алулар буенча дәүләт комитеты коллегиясе утырышында чыгышын елның киеренкелеген исәпкә алып: “Вазгыять тотрыклы булуга карамастан, рухыгызны югалтмагыз” дип тәмамларга җыенган иде.
«Куркытма, – дип бүлдерде аны Рөстәм Миңнеханов. – Барысы да яхшы, ничек кенә булмасын, без әле күз тимәсен, яшибез. Тормышның бу этабын иң аз югалтулар белән үткәрергә, ә моның өчен дөрес санарга, фаразларга кирәк. Энергияне саклау законы бар: әгәр берәр нәрсә китсә, аның урынына башкасы килә. Акча килгән җирдә калу турында уйлагыз.
“Иң мөһиме –кешеләр”
“Без иң мөһиме акча дип уйлыйбыз, әмма иң мөһиме – белемле, әзерлекле, лидерлык сыйфатларына ия булган кешеләр «. Татарстан Рәисе былтыр «XXI гасырда шәһәр агломерацияләренең мөмкинлекләре” форумында республика өчен кеше капиталының кадере турында шулай дип белдерде.
«Тяп-ляп эшләмәгез!»
2017 елда хөкүмәт Йортында узган киңәшмәдә Рөстәм Миңнеханов юл компанияләре эшенә контрольне көчәйтергә , федераль трассаларны да кертеп, эшләрнең сыйфатын җентекләп тикшерүне таләп итте.
–Болай асфальт салалармыни? Күзе күрмәс кешегә дә күренә бит бу. Мин юлчы түгел. Узып китүгә шунда ук: «Нәрсә бу?!» Тяп-ляп ясамагыз!», – дип әйтәм, –диде Рөстәм Миңнеханов.
«Хөкүмәттә хатын-кыз һичшиксез булырга тиеш»
Рөстәм Миңнеханов еш кына хатын–кызларның эшен мактый һәм бәяли. Моннан тыш, ул Татарстан хөкүмәтендә һичшиксез гүзәл затлар булырга тиешлеге турында ачыктан-ачык сөйли.
– Хатын-кызлар да хөкүмәттә булырга тиеш. Минем теге яки бу катлаулы бурычларны хәл итә торган ярдәмчеләрем күп. Хатын-кызлар эшне җентекләбрәк башкара, –диде Татарстан Рәисе.
“Ошарга тырышу өчен түгел…”
“Кемгәдер ошау өчен түгел, нәтиҗәсе булсын дип эшлим» . Рәис 2020 ел йомгакларына багышланган матбугат очрашуында шулай дип белдерде. “Мин бит кемгәдер ошар өчен эшләмим, соңыннан нәтиҗәсе булсын дип эшлим, – диде Рөстәм Миңнеханов.
“Гаиләң, дусларың барлыгын һәрвакыт истә тотарга кирәк”
Үзенең 60 яше тулган көннәрдә Рөстәм Миңнеханов республика массакүләм мәгълүмат чаралары вәкилләре белән очрашты. Әңгәмә барышында шәхси тормыш турында да сүз чыкты. Журналистлар аннан: “Юбиляр туган көнендә гаиләсенә, дусларына вакыт табармы?” – дип кызыксынды.
Рөстәм Миңнеханов, уйлап та тормыйча: “Табылыр. Юбилейда гына түгел, һәрвакыт гаилә, дуслар өчен вакыт таптык. Якыннарың барлыгын, һәр чак истә тотарга кирәк. Эш ул үзгәреп тора”, – диде Рәис.
«Әгәр эшләсәм, Татарстанда эшлим»
2014 елда Рөстәм Миңнеханов социаль челтәрләрнең берсенә шундый пост бастырды: «Минем позициям: әгәр мин эшләсәм, Татарстанда эшлим. Безнең эштә иң мөһиме – кешеләрнең ышанычы!»
Мондый алым Татарстанга югары нәтиҗәләргә ирешергә мөмкинлек бирде. Социаль-икътисадый үсешнең төп күрсәткечләре буенча республика илнең лидерлары бишлегенә керә.
«Рөстәм исеме – уңышлы булу өчен зур мөмкинлек»
Узган ел «Мәскәү – Татарстан күпере» форумында Рәис илнең катлаулы чор кичерүен, әмма нәкъ менә шундый вакытта халыкның берләшүен әйтте.
–Монда СВО геройлары – яшьләр өчен үрнәк. Алар сүздә түгел, ә үз эшләре белән дә ничек патриот булырга, Ватанга хезмәт итәргә кирәклеген күрсәтте. Сез, яшьләр, аларга карап үрнәк алырга тиеш, – диде Татарстан Рәисе чарага җыелган яшьләргә.
Чыгышын Рәис шаярту белән тәмамлады: “Сез, мөгаен, Рөстәм исеменең уңышлы булу өчен мөмкинлек икәнлеген шунда ук аңлагансыздыр”.
Телеграмда безнең каналга кушылыгыз: https://t.me/vatantat