Кичә КамАЗ эшчеләре ике атналык корпоратив ялдан соң эшкә керешкән. Бу хакта автогигантның матбугат хезмәте хәбәр итә. Быел күмәк ял 17 – 30 август көннәренә туры килгән. Еллык ялның икенче яртысы бу. Беренче өлеше 9 – 22 гыйнварда узган.
Компания генераль директоры Сергей Когогин, җәйге ял алдыннан йомгак ясап, автогигантның җиде ай эчендә Россия һәм чит илләргә 18,3 мең йөк машинасы сатуын белдергән иде. Бу – узган елдагы күрсәткечтән 9 процентка зуррак. Быел КамАЗ 35 709 автомобиль җитештерергә тиеш. Шуның 29 меңен – Россиядә сату, 6709ын чит илләргә озату күздә тотыла.