Россия Президенты Владимир Путин Россиянең оборона министры Сергей Шойгуга махсус операция зонасындагы фронт сызыгында ут туктату режимы кертергә кушты. Бу режим 6 гыйнвар — көндезге сәгать уникедән (Мәскәү вакыты белән) башлап, 7 гыйнвар — төнге уникегә кадәр дәвам итәчәк.
«Патриарх Кириллның мөрәжәгатен исәпкә алып, Россия Федерациясенең оборона министрына Украинада ике якның хәрби бәрелеш сызыгында 6 гыйнвар — көндезге сәгать уникедән (Мәскәү вакыты белән) башлап, 7 гыйнвар — төнге уникегә кадәр ут туктату режимы кертергә кушам», — диелә Путин күрсәтмәсендә.
Билгеле булганча, кичә Патриарх Кирилл Раштуа бәйрәмендә татулык саклау тәкьдиме белән чыккан иде.
Моннан тыш Россия Президенты Украинаны да бу чорда утны туктатырга өндәде.