Татар егете блогер Марат Дәүләев икенче тапкыр Африка кызына өйләнде. Аның беренче хатыны да Африка кызы иде. Баксаң, алар аерылышкан икән.
Марат ислам дине кушканча яши. Беренче хатыны исә христиан динендә булган. Икенче хатыны ислам динен кабул иткән. Алар күптән түгел язылышкан. Россиягә кайтырга җыеналар икән.
– Гыйнвар аенда язылыштык. Замбиядә кәләш өчен ачка түлисе. Без 45 000 квача –166 мең сумга килештек. Тик минем өчен бу зур сумма. Әлегә кәләшне 15 мең сумга сатып алдым. Алар башта 260 мең сум сораган иделәр, – ди ул.
Марат эретеп ябыштыручы булып эшли икән. Шулай ук социаль челтәрләрдә үз сәхифәсен дә алып бара. Сәяхәт итәргә ярата. Җиде илдә булган ул. 9 ай Төркиядә эшләгән. Әмма Замбия күңеленә хуш килгән. Шуңа да ул яңадан монда килгән.