Кичә Россия Хөкүмәте Дәүләт Думасына бер ел эчендә 5 миллион сумнан артыграк күләмдә акча эшләгән физик затлар кеременә салым ставкасын 15 процентка җиткерү турында закон проектын кертте.
Документ Россия парламентының түбән палатасы сайтына урнаштырылган. Закон проектының максаты – каты һәм сирәк очрый торган чирләрдән интегүче балаларны дәвалауга өстәмә акча чыганагын булдыру. Салым ставкасын киләсе елның 1 гыйнварыннан арттыру күздә тотыла. Россия финанс министры Антон Силуанов белдергәнчә, әлеге яңалык эшләүче халыкның бер процентына кагылачак.