Моннан бер ай элек Алсу шалтырата. «Бик тә ярдәмгә мохтаҗ кешең юкмы?» – ди ул. Ничек булмасын – бер генә түгел, әллә ничә! Иртәгесен телефонга хәбәр килә: бу егеткә булышасы иде…
Моңарчы үзе бик күпләрне янгыннан коткарган Данис Фәсхетдиновта яман чир (без аның турында «ВТ»да язып чыккан идек инде. – Ред). Әмма күңелен төшерми егет. Иманы сабырлык өсти. Хатыны белән бер ул үстерәләр. Фатирлары да вакытлыча торып торырга гына алынган… Даниска катлаулы операция ясалса да, химия терапиясе һәм тернәкләндерү курслары үтәр өчен акча кирәк.
Алсу белән Азат Данис хакында ишеткәч, беравыздан аңа ярдәм итәчәкләрен әйтте. Концерт буласы көнне дулкынланып көттек. Хәтта коткаручы булып эшләүче егетләр дә Лаеш районының Габишев бистәсендә урнашкан мәдәният йортына кыяр-кыймас кына килеп керде. Татар эстрадасы җырчыларының әнә шулай, төркеме белән чыгыш ясап, билетлар сатылудан кергән акчаны үз хезмәттәшләренә бирәчәкләрен ишеткәч, аларның да күңелләре тулды. Алсу белән Азат аларны да, башка тамашачыны да тиз юатты. Әллә шәһәр шау-шуыннан ераграк киткәнгә, без бу концертта бөтенләй онытылып ял иттек. Тормыш мәшәкатьләре бер мәлгә туктап торды. Азат әйтмешли, 200 көн концерт карамыйча тору әллә безне үзгәрткән, әллә инде алар сәхнәне бик сагынган.
– Без узган ел куя алмаган концерт программасы белән килдек. Ул гаилә темасына багышланган иде, – ди Азат Фазлыев. Гаилә дигәннән, алар кич буе әллә ниләр сөйләштеләр. Азат Аллаһы Тәгаләдән ни генә сорап бетермәде. Тамашачылар хәтта, бер кыз кирәк сезгә, дип тә, Азаттан теләк теләтте. Габишев сәхнәләреннән сорагач, әле кем белә, кызлы да булып куярлар. Шаян сөйләшүләр белән бергә күңел тулган чаклар да булды. Азат – әнисен, Алсуның әтисен сагынып сөйләде. Ялгыз калган әтисе Рафаэль абыйның төпле киңәшләрен безгә дә ачты: «Гомер көзендә янәшәгездә сөйгән ярыгыз булсын. Хатыннарыгызны кадерләп яшәгез», – дигән икән. Азат әтисенең киңәшен тотадыр кебек тоелды миңа. Аларның карашларында, ут янып торган күзләрендә күпме наз, ярату күрергә була! Җырчылар әнә шул җылылыкны залга да таратты. Лаеш районы халкы аларны бик яратып калды.
…Иртәгесен җыелган акчаны җырчылар белән Данисның картасына салдык. Озак та үтмәде, телефоныма аннан хәбәр килеп төште. Ул Санкт-Петербургта химия терапиясе алып, бер көн элек Казанга кайткан икән. Хәйрия концертын Инстаграм аша караган.
– Миңа ярдәм кулы сузган һәркемгә: җырчы гаиләгә, тамашачыларга Аллаһы Тәгаләнең рәхмәте булсын. Исән-сау булыгыз. Авырмагыз! – диде ул. Данис ике химия терапиясе алган. Тагын биш тапкыр барасы бар икән әле. Ул исән-сау терелеп кайтасына ышана. Гаиләсе дә, якын дуслары да шул өмет белән яши…
Гөлгенә ШИҺАПОВА
