Быел кабакның уңышы бик шәп булды. Узган ялларда Балык Бистәсе районы Казаклар Чаллысы авылында яшәүче Лариса һәм Николай Кузьминнар гаиләсе кайткан кунаклары белән гөрләшеп кабак җыйган. Уңышны көзен мал-туарга ашатып бетермичә, кышка да саклыйсы килә бит. Аны ничек сакларга соң, дип мөрәҗәгать итте алар.
Әлеге сорауга җавап табарга бакчачы-блогер Эльмира Исхакова ярдәм итте.
– Моның өчен, беренчедән, нәүрәптәге (кайбер якларда «баз» диләр) дымлылык 75–80 проценттан артып китмәскә тиеш.
Икенчедән, җилләтүнең күздә тотылуы кирәк. Шул ук вакытта кабакларны коры җиргә түгел, ә бик тыгыз итмичә генә киштәләргә тезеп куегыз. Андагы һава температурасы да кыш буе бер үк чамада – якынча 8 градус тирәсе торса, нәүрәптәге кабаклар, шулай ук башка яшелчә дә язга кадәр шикәр кебек сакланачак.
Телеграмда безнең каналга кушылыгыз: https://t.me/vatantat