Кышкы Олимпия Уеннары башланырга өч атнадан азрак вакыт калды. Әлегә бу ярышларда чыгыш ясаячак спортчылар исемлегендә Татарстаннан бер генә кеше бар.
Чаңгыда берәү генә калды
Узган ел октябрь ахырында Россия Олимпия комитеты Олимпиадага барырга мөмкин спортчыларның исемнәрен атады. 599 кешелек исемлеккә Татарстаннан 20 спортчы керде. Әмма инде хәзердән үк аларның саны азрак буласы билгеле. Әйтик, чаңгычылар исемлегендә республикадан 5 кандидат бар иде. Христина Мацокина, Анна Нечаевская, Андрей Ларьков, Артем Николаев һәм Антон Тимашов арасыннан бары Христина гына төп командага эләкте. Калганнары исә илнең иң шәп чаңгычылары сафында Россия данын якларга лаек икәнлекләрен раслый алмады. Безнекеләргә үз көчләрен күрсәтергә коронавирус белән авыру да комачау итте.
Христина Мацокинага – 23 яшь. Тумышы белән ул – Магадан өлкәсеннән. Сүз уңаеннан, Россиянең Чаңгы узышлары федерациясе президенты Елена Вяльбеның якташы. Соңгы елларда Татарстан данын яклый. Дүрт ел элек узган Олимпиадага бездән Андрей Ларьков белән Анна Нечаевская барып, икесенә өч медаль – бер көмеш һәм ике бронза алып кайтканнар иде.
Галимовка ни булган?
Пекинга баруы ихтимал спортчылар исемлегенә «Ак барс»та чыгыш ясаучы 9 хоккейчы кергән иде. Ул вакытта аларның җыелма команда составына эләгү мөмкинлеге бик аз дип саналды. Ник дигәндә, төп игътибарны НХЛда чыгыш ясаучы егетләргә бирергә җыендылар. Әмма океан артындагы лиганың түрәләре, коронавирустан куркып, үз уенчыларын Олимпиадага җибәрмәү турында кабул итте. Шулай итеп, команданы КХЛда, ягъни үзебездә уйнаучылардан туплыйлар. Шуңа да карамастан, киңәйтелгән составка «Ак барс»тан нибары өч егет – капкачы Тимур Билалов, һөҗүмчеләр Артем Галимов белән Дмитрий Воронков кына эләкте.
Бу әле алар Пекинга барып җитә дигән сүз түгел. Исемлек тагын 11 кешегә кыскарачак. Дмитрий Воронковның әле күптән түгел генә савыгуын искә алу урынлы булыр. Атна ахырында исә Артем Галимовның җыелма командага барудан баш тартуы турындагы хәбәрләр игътибарны җәлеп итте. Ике төрле мәгълүмат булды. Берәүләргә ышансаң, һөҗүмче төп составка эләгә аласына ышанмый, шуңа күрә әзерлек өчен Мәскәүгә барып йөрергә теләмәгән. Икенчеләре исә егетнең гаиләсендә мәшәкать килеп чыкканын җиткерде, шуңа күрә башында хоккей кайгысы түгел икән. Ахыр чиктә барысы да хәл ителгән, Артем Галимовның җыелма командага барасын әйттеләр.
Камиләдән медаль көтәбез
Олимпиадада Казан кызы Евгения Тарасова да чыгыш ясар дигән өмет бар. Илнең Фигуралы шуу федерациясе Пекинга барасы спортчылар исемлеген әлегә игълан итмәсә дә, Евгениянең иптәше Владимир Морозов белән җыелма команда составына керәсе шик уятмый. Узган атна ахырында алар Европа чемпионатында парлы шууда көмеш медаль яулады. Билгеле булганча, Тарасова белән Морозов 2018 елгы Олимпиадада икенче урынны алган иде.
Казанда туып-үскән Камилә Вәлиева Таллинда Европа чемпионы исемен яулап, Пекин Олимпиадасында җиңүгә төп дәгъва кылучы икәнен күрсәтте. 15 яшьлек кызны җиңүе белән Татарстан Президенты Рөстәм Миңнеханов та котлады. Камилә бу сезонда Гран-при ярышларының ике этабын отты, Россия чемпионы булып танылды. Инде менә Европа чемпионатында җиңү яулады. Әлеге ярышларда 9 мәртәбә дөнья рекордын яңартты. Таллинда бер мәртәбә ялгышуга дучар булды, әмма әлеге хата Пекинга яхшырак әзерләнергә этәргеч булачак. «Олимпия Уеннарына эләгүем белән бик бәхетле мин. Бу хакта һәр спортчы хыяллана. Олимпиадага бару үзе үк – зур уңыш», – диде Камилә «Матч ТВ» каналы хәбәрчесенә. Хәтерләсәгез, Пекин Олимпиадасында Россия спортчылары ике алтын медаль откан, шуның берсен – хоккейчылар, икенчесен исә фигуралы шууда татар кызы Алинә Заһитова яулаган иде.
Фото: joinfo.com
АнонимКирәкми!Пионерияне кайтарырга кирәкме?
Загрузка ...
