Апас районындагы Тәүгелде авылы халкы Камилә өчен аеруча борчылды бу көннәрдә. Шулай булмый ни! Алар спортчы кызны якташлары дип саный. Камиләнең бабасы Әнвәр Вәлиев Тәүгелдедә туып-үскән. Авылда Әнвәр абыйның апасы Нәзимә белән энесе Гомәр яши.
– Бу көннәрдә бөтен авыл гөр килә. Урамга чыксак, бөтен кешенең телендә – Камилә. Үзебезнеке бит, авылныкы. Бик горурланабыз! Безнең авыл бердәм бит ул. Әнвәр абыйны да белмәгән кеше юк. Кызганыч, 47 яшендә үлеп китте ул. Исән булса, сөенеченнән нишләмәс иде?! Камиләнең әбисе исән-сау, Казанда яши. Бүген бөтен дөнья сокланган баланы 3 яшьлек чагында авылга да алып кайтканнар иде. Кечкенә генә, ал төстәге күлмәк кигән, сөеп туя алмаслык кызчык булып истә калган, – дип сөйли Гомәр абыйның хатыны Әлфинур апа Зиннәтуллина. – Әлбәттә инде, бик борчылдык Камилә тирәсендә килеп чыккан шау-шуга. Кызганабыз, кечкенә генә кызчык бит! Юк инде, наным, 15 яшьлек бала ничек тыелган дару эчсен? Шулай да, барысы да ачыкланыр, гаделлек җиңәр дип өметләнәбез.