Үз эшенә бирелгән үз эшенең остасы, ышанычлы дус, тынгысыз йөрәк, оста житәкче. Вакытсыз вафат булган Татарстанның сәламәтлек саклау министры Марат Садыйковны якыннарын, дуслары, хезмәттәшләре шулай дип искә ала.
Татарстанның сәламәтлек саклау министры Марат Садыйков вафат
Бүгенге иртә кайгылы хәбәрдән башланды. Ял көненә каршы төндә 53 яшендә Татарстанның сәламәтлек саклау министры Марат Садыйков вакытсыз вафат булды.
Әле узган атнада гына министрлыкның узган елгы эш йомгакларына багышланган коллегия утырышында киләчәккә зур максат-бурычлар куйган иде ул. Ни кызганыч, аларны Садыйковның үзенә чынга ашырырга язмаган булган икән.
Марат Садыйковның республиканың сәламәтлек саклау тармагына, аны ныгытуга керткән өлеше бик зур. Татарстан Президенты Рөстәм Миңнеханов сүзләре белән әйтсәк, үз эшенә чын күңелдән сәләтле табиб иде ул.
— Бу – Сезнең өчен зур югалту, бөтен республикабыз өчен зур югалту. Тәҗрибәле, абруйлы җитәкче һәм җаваплы, әмма игелекле һөнәргә чын күңелдән бирелгән талантлы табиб вафат булды, — диелә Марат Садыйковның тормыш иптәше Динара Илгизәр кызына Президенты тарафыннан юлланган кайгы уртаклашу хатында.
Рөстәм Миңнеханов билгеләп үткәнчә, Марат Садыйков Татарстан сәламәтлек саклау системасын ныгытуга, шәһәрнең 7 нче клиник хастаханәсе базасында Ашыгыч медицина үзәген булдыруга, Татарстан халкының тормышы һәм сәламәтлеге бәйле күп кенә актуаль мәсьәләләрне хәл итүгә зур өлеш кертте.
“Һөнәри осталык һәм хезмәт белән мавыгу үрнәге, ул һәрвакыт эшенә максималь көч һәм энергия бирде, хезмәттәшләре һәм авырулары аны лаеклы хөрмәт итә иде. Юмарт җанлы һәм кайнар йөрәкле бу искиткеч кеше, аның туктаусыз иҗади хезмәте нәтиҗәләре турында бездә рәхмәтле якты хатирәләр кала. Сезнең авыр кайгы-хәсрәтегезне ихлас күңелдән уртаклашам, бу кайгылы көннәрдә сезгә көч һәм ныклык телим. Шулай ук балаларыгызга, барлык туганнарыгызга һәм якыннарыгызга кайгы уртаклашу сүзләрен җиткерүегезне сорыйм”, – диелә хатта.
Рөстәм Миңнеханов Марат Садыйковның тормыш иптәшенең кайгысын уртаклашты
Татарстан Президенты Администрациясе җитәкчесе Әсгать Сәфәров Марат Садыйков эшчәнлеге Гиппократ антына тугрылыкның лаеклы үрнәге иде дип саный.
— Аның эшчәнлеге медицина җәмәгатьчелегендә югары абруй һәм күп санлы авыруларның рәхмәтенә лаек булды. Марат Наил улының вакытсыз китүе – ул, Сезнең өчен, аның туганнары һәм якыннары өчен генә түгел, ә бөтен Татарстанның сәламәтлек саклау системасы өчен дә зур югалту. Сезнең кайгыгызны уртаклашам, Сезгә бу кайгылы көннәрдә көч һәм ныклык телим. Балаларыгызның, тугры дусларыгызның игътибары һәм ярдәме, бергә гомер иткән еллар турында истәлекләр сезгә бу авыр сәгатьтә таяныч булсын, — дип министрның якыннарының кайгысын уртаклашты Әсгать Сәфәров.
Россия Дәүләт Думасы депутаты Айрат Фәррахов Марат Садыйковның вакытсыз үлемен республика өчен зур югалту дип саный.
— Марат Садыйковның вакытсыз, кисәк якты дөньядан китуе театрәндерде. Ул республиканың сәламәтлек саклау тармагын үстерүгә зур өлеш кертте. Бу тармак өчен тагын әллә ниләр дә эшли алган булыр иде. Язмышлар узмыш юк шул. Аның турында якты хатирәләр йөрәгемдә мәнге сакланыр, — ди депутат.
Быелның февралендә Марат Садыйковның министр вазыйфасына билгеләнүенә биш ел тулган булыр иде. Яшерен-батырын түгел, соңгы биш еллык республиканың медицина тармагы өчен аеруча катлаулы булды. Коронавирус котырган пандемия чоры аеруча нык сынады. Ләкин Марат Садыйков житәкчелегендәге медицина тармагы бу сынауны лаеклы рәвештә узды. Республика хастаханәләре тиз арада кирәкле жихазлар, медицина кирәк-яраклары, дарулар белән тәэмин ителде. Казанда кыска вакыт эчендә өр-яна инфекция хастаханәсе төзелде.
Марат Садыйков чорында Чаллыда күптән көтелгән онкология диспансеры да ачылды. Казанда балалар онкология үзәге, 7нче хастаханә базасында тернәкләндерү үзәге, Түбән Камада ашыгыч медицина ярдәме үзәге эшли башлады. Республиканың төрле бар почмагында телемедицина технологияләре кулланылу да — Марат Садыйков көче белән ирешелгән уныш.
Марат Садыйков кешелеклеге белән дә ист калды. Хәтерләсәгез, 2021 елның декбарендә юл фажигасенә очраган хатын-кызга ярдәм иткән иде ул. Узган елның гыйнварында исә Марат Садыйков Берләшкән Гарәп Эмирлекләреннән Казанга юл тоткан очкычта хәле авырайган хатын-кызга да беренче ярдәм күрсәтте.
Табиб хезмәттәшләре аны үзенә һәм аның җитәкчелегендә эшләүчеләргә карата таләпчән, кешеләрне иң югары профессиональ дәрәҗәгә күтәрә белүче житәкче иде дип искә ала.
— Марат Наил улы һәрвакыт, чикләүләр түгел, мөмкинлекләр бирде — бу аның бәяләп бетергесез өстенлеге иде. Берләштерү һәм юнәлеш бирү, энергия һәм позитив белән тулыландыру – аның иң яхшы профессиональ сыйфатларының берсе булды. Бик нык кайгырабыз, — дип билгеләделәр Татарстан Республикасы Сәламәтлек саклау министрлыгында.
Марат Садыйков белән хушлашу мәрасиме 30 гыйнварда Идел буе спорт, физик культура һәм туризм университетында (Универсиада авылы, 35 йөрт) була. Чара 8.00сәгатьтә башлана. Мәрхүм Тынычлык бистәсендәге зиратта җирләнәчәк.
