Айдар Метшин: «Татарстанда яшәүчеләрнең ихтыяҗына карап эш итәргә кирәк»

Кешеләр өчен мохит

Белгечләр билгеләп үткәнчә, җәмәгать урынын яңартуның төп таләбе – аны кешеләргә ничек тә уңайлы итү. «Беренче чиратта, җәмәгать урыннарының кешеләр өчен: бала арбасы белән йөрүче яшь әниләр өчен, пенсионерлар, яшьләр өчен уңайлы булуыннан чыгып эш итәргә кирәк. Кешеләргә шартлар тудырыла икән, туризм да киләчәк: ә ул инде башка юнәлешләрне, шул исәптән кече һәм урта бизнесны үстерүгә мөһим этәргеч бирә», – диде Россия Дәүләт Думасы депутаты Айдар Метшин.

Парламентчы Түбән Камадагы «Кояшлы алан» проектын мисалга китерде. Шәһәр халкының соравы буенча бу территорияне универсаль спорт мәйданчыгына әйләндергәннәр. Айдар Метшин бүген республиканың башка сәнәгать шәһәрләренә дә шундый ук үзгәреш кирәклеген билгеләп үтте.

Уңайлы шәһәр районнан башлана

Казанның баш архитекторы Илсөяр Төхвәтуллина әйтүенчә, шәһәр мохитен үстерү шәһәр белән төзүчеләр арасындагы даими элемтәне таләп итә. Моннан тыш архитектура районның тарихи үзенчәлекләрен исәпкә алырга тиеш.

Шәһәр халкы белән бергә

Очрашуда катнашучылар белдергәнчә, шәһәр проектларын гамәлгә ашырганда, халыкның фикерен исәпкә алырга кирәк. Казан Парклар һәм скверлар дирекциясе директоры Айгөл Латыйпова әйтүенчә, халыктан булачак паркны ничек күзаллаулары турында гына түгел, аның көндәлектә ничек эшләргә тиешлеге турында да белешәләр.

Мондый шәһәр проекты мисалында Кабан күле яры буеның өченче өлешен телгә алдылар. Аны төзекләндергәндә, шәһәрдә яшәүчеләрнең бер өлеше яр буеның табигыйлеген саклап калу теләген белдерде. Нәтиҗәдә аның төзекләндерелгән өлешләре янында табигый зоналарны да саклап калдылар. Яр буе инфраструктурасы мөмкинлекләреннән шәһәр халкы да, шулай ук туристлар да файдалана ала.

«Туристлар ихтыяҗын гына күздә тоту түгел бу. Шәһәр халкы да саф һавада йөрү, чаралар, ниндидер шөгыль өчен бу инфраструктурадан файдалана. Алар башка шәһәрләрдә ачык киңлекләрнең ничек оештырылуын күргән инде. Хәзер алардан файдалана да белә», – дип билгеләп үтте Айгөл Латыйпова.

Үзенчәлеген сакларга

Туган якны өйрәнү белгече, Казан тарихын һәм архитектурасын өйрәнүче Руслан Бикуев әйтүенчә, тарихи мохитне саклау заманча архитектурадан баш тартуны аңлатмый. Яңа биналар, масштабны, манзара һәм урамның үзенчәлекләрен исәпкә алганда, иске кварталларга матур гына кереп утырырга мөмкин. Ул шулай ук заманча инфраструктура белән тарихи элемтәнең шәһәр халкында биредән китмәү теләге булдыруын билгеләп үтте.

«Шәһәр яшәргә һәм ниндидер яңалык алып килергә тиеш. Аерым биналарны гына түгел, ландшафтны да сакларга кирәк: асылда нәкъ менә шул шәһәрнең үзенчәлеген тудыра да инде», – диде Руслан Бикуев.

Туктап калмаска

Белгечләр кешегә тормышының һәрбер этабында уңайлы яшәү өчен мохитнең үстерелергә тиешлеген искәртеп үтте. Айдар Метшин әйтүенчә, Татарстанның башка районнарында да бу эшне дәвам иттерү мөһим. Шул ук вакытта иң элек халыкның ихтыяҗларына йөз тотып эшләргә кирәк.

«Матур урыннар гына түгел бу, киләчәккә шартлар да. Кешеләр өчен мохит тудырганда лаеклы тормышта яшәү мөмкинлекләре күбрәк барлыкка килә», – дип йомгаклады сүзен Айдар Метшин.

БЕЗНЕҢ МАКС КАНАЛЫНА ЯЗЫЛЫГЫЗ!