Алексей Песошин: «Лениногорск – барлык кирәкле ресурсларга ия район»

Утырышта Лениногорск районы башлыгы Марат Гыйрфанов хисап нотыгы белән чыгыш ясады.

Тулаем территориаль продукт күләме 135,9 млрд сум тәшкил иткән.

30,9 млрд сумлык продукция төяп озатылган. Финанслауның барлык чыганаклары исәбенә төп капиталга инвестицияләр күләме - 10,5 млрд сум (тулырак Лениногорск районы сайтында - https://leninogorsk.tatarstan.ru/index.htm/news/2496934.htm

Татарстан Республикасы Премьер-министры билгеләп үткәнчә, мондый утырышлар узган елга йомгак ясарга, агымдагы хәлләрне һәрьяклап анализларга, потенциаль мөмкинлекләр турында фикер алышырга һәм өстенлекле бурычларны билгеләргә мөмкинлек бирә.

«2025 ел Ватанны саклаучылар елы һәм Бөек Ватан сугышында Җиңүнең 80 еллыгы билгесе астында узды, – дип искәртте ул. – Бөтен республика буенча тантаналы чаралар, сугыш ветераннарын һәм махсус хәрби операциядә катнашучыларны очрашулар һәм хөрмәтләүләр узды.

Россия Федерациясе Президенты Владимир Владимирович Путин 2026 елны Халыклар бердәмлеге елы дип игълан итте. Бу бигрәк тә тышкы чакырулар шартларында актуаль, безнең бердәмлек иҗтимагый-сәяси тотрыклылыкның гына түгел, ә алгы сызыктагы хәрби уңышларның да нигезе булып тора". Татарстанда Ватанны саклаучыларга һәм тыл хезмәтчәннәренә хөрмәт йөзеннән 2026 ел Хәрби һәм хезмәт батырлыгы елы дип игълан ителде.

"Бүген төрле милләт вәкилләре иңгә-иң куеп Ватаныбыз иминлеге өчен көрәшәләр. Алар арасында – дистәләгән мең татарстанлы, шул исәптән Лениногорск районыннан да, – диде Алексей Песошин. – МХО башланганнан бирле 17 татарстанлы Россия Герое, меңләгән якташларыбыз Батырлык ордены кавалерлары булды. Сезнең якташыгыз – Россия Герое Дамир Исламов батырлыкның ачык мисалы булып тора, аның батырлыгы сугыш кырында безнең барыбыз өчен дә горурлык хисе уятты».

Алексей Песошин ассызыклаганча, бүген уртак бурыч – хәрбиләргә, аларның гаиләләренә һәрьяклап ярдәм итү, шулай ук махсус хәрби операция ветераннарын тыныч тормышка яраклаштыру. Лениногорск районында бу юнәлештә көндәлек зур эш алып барыла, дип искәртте ул һәм предприятиеләргә, бизнеска, депутатларга һәм битараф булмаган барлык лениногорскилыларга саллы ярдәмнәре, МХОдә катнашучыларга һәм шефлыкка алынган территорияләргә даими ярдәмнәре өчен рәхмәт белдерде.

Барлык кыенлыкларга да карамастан, республика икътисады үсеш темпларын һәм Россия төбәкләре арасында алдынгы урыннарны саклап калды. Узган ел йомгаклары буенча тулаем төбәк продукты күләме 5,7 трлн сумнан артып киткән; сәнәгать җитештерүе – 6 трлн сум; төзелеш – 1 трлн сум; авыл хуҗалыгы тулаем продукциясе – 400 млрд сум.      

Ел йомгаклары буенча республика салым түләүчеләре бюджет системасына 2 трлн 148 млрд сумнан артык салым һәм салым булмаган түләүләр керткән. Кызганычка каршы, Татарстан Республикасының берләштерелгән бюджетына салымнар буенча бурыч арту тенденциясе күзәтелә, диде Татарстан Республикасы Премьер-министры, һәм 2026 елның 1 гыйнварына ул 12,6 млрд сумга җитте, шул исәптән Лениногорск муниципаль районы буенча – 190 млн сум.

Татарстан Республикасы Министрлар Кабинеты башлыгы район башлыгын һәм җирле үзидарә органнарын юридик һәм физик затларның салым йөкләмәләрен үтәү мәсьәләсен аерым контрольгә алуларын сорады.

Ел йомгаклары буенча муниципаль берәмлекләрнең социаль-икътисадый үсеше рейтингында Лениногорск муниципаль районы, узган елгы нәтиҗәне 9 позициягә яхшыртып, 24 нче урынны алды. Шул ук вакытта тулаем территориаль продукт күләме буенча – 6 нчы урында, уртача хезмәт хакы буенча – 13 нче урында, үзләре җитештергән төяп җибәрелгән товарлар күләме буенча 15 нче урында.

"Икътисад өлкәсендә җирле хакимиятнең өстенлекле бурычларыннан берсе – кече һәм урта бизнеска ярдәм итү. Республикада 185 меңнән артык кече һәм урта эшкуарлык субъекты теркәлгән, КУЭ субъектлары тулаем төбәк продуктының дүрттән бер өлешен тәшкил итә, салым керемнәре бюджет керемнәренең 21%ын тәшкил итә. Лениногорск районы икътисадында кече һәм урта бизнес өлеше 10% тәшкил итә - бу муниципалитетлар арасында 34 нче урын», – диде Алексей Песошин.

Рейтингның түбән булуы, барыннан да элек, тулаем территориаль продуктта (ТТП) эре предприятиеләр җитештерү күләмнәренең зур өлеше белән аңлатыла. Районда эшкуарлыкны үстерү күрсәткечләре республикадагы уртача күрсәткечләрдән дә түбәнрәк. КЭУ субъектлары саны буенча район 26 нчы урында.

Алексей Песошин искәрткәнчә, Лениногорск районы территориясендә аккредитация узган өч сәнәгать мәйданчыгы һәм бер агросәнәгать паркы эшли, алар 60%ка тулган.

«Гамәлдәге резидентларның җитештерүләрен киңәйтү һәм яңаларын җәлеп итү буенча эшне активлаштырырга кирәк, – диде ул. – Сәнәгать парклары инфраструктурасын үстерүгә ел саен 500әр млн сум бүлеп бирү турында карар кабул ителде инде. Россия Икътисадый үсеш министрлыгы программасы буенча җайланмалар сатып алу өчен бер мәйданчыкка 200 млн сумга кадәр акча каралган».

Агросәнәгать комплексына килгәндә, ул республика икътисадының стратегик тармагы булып кала.

2025 елда республиканың аграр комплексы сизелерлек нәтиҗәләргә иреште. Авыл хуҗалыгы продукциясе күләме 400 млрд сумнан артып киткән. Алексей Песошин искәрткәнчә, Татарстан авыл хуҗалыгының төп юнәлешләре буенча илдә алдынгы урында, сөт җитештерү буенча – 1 нче, бәрәңге тулаем җыю буенча – 2 нче, шикәр чөгендере җитештерү буенча 5 нче урында тора.

Лениногорск аграрийлары ел йомгаклары буенча республика районнары арасында рейтингта 31 нче урында, авыл хуҗалыгы продукциясенең тулаем күләме буенча – 29 нчы урында, хуҗалык итүнең кече формалары буенча – 25 нче урында.

«Район әлегә терлекчелек өлкәсендә тәнкыйть зонасында кала», – дип төгәлләштерде Песошин.

Социаль үсеш өлкәсендә сәламәтлек саклау һәм мәгариф мәсьәләләре өстенлекле булып кала. 2025 елда гына да Татарстанда медицина учреждениеләре инфраструктурасын яхшыртуга 10 млрд сумнан артык акча тотылган, 2026 елда тагын 3,2 млрд сум җибәрү планлаштырыла.әмма заманча җайланмалар квалификацияле медицина персоналыннан башка әһәмиятле түгел.

Татарстан Республикасы Сәламәтлек саклау министрлыгының йомгаклау коллегиясендә сезнең райондагы медицина учреждениеләрен кадрлар белән тәэмин итүдә хәлнең канәгатьләнерлек булмавы билгеләнде. Күрелгән ярдәм чаралары тиешле нәтиҗә бирмәде әле.

Лениногорск районы җитәкчелегенә, республика Сәламәтлек саклау министрлыгы белән берлектә, сәламәтлек саклау учреждениеләренә медицина белгечләрен җәлеп итү буенча эшне активлаштырырга кирәк.

Мәгариф өлкәсе турында сөйләгәндә, Алексей Песошин хәбәр иткәнчә, Лениногорск районында БДИ нәтиҗәләре узган уку елы йомгаклары буенча барлык төп фәннәр буенча республикадагы уртача күрсәткечләрдән түбәнрәк. Әмма шул ук вакытта район йөз балл җыючылар саны буенча Ттоп‑5 муниципалитетка керә.

"Һәр баланың, мәктәпкә бәйсез рәвештә, потенциалын ачу һәм сыйфатлы белем алу өчен тигез мөмкинлекләре булсын өчен бурыч. Шулай ук мәктәпләрне кадрлар белән тәэмин итүгә дә игътибар итүегезне сорыйм. Агымдагы уку елы башына Лениногорск районы буенча 43 укытучыга ихтыяҗ бар", - диде ТР Премьер-министры.

Аннары ул юл хәрәкәте иминлеге мәсьәләләренә тукталды. «Без көн саен юл-транспорт һәлакәтләрендә кешеләрне югалтабыз. 2025 елда республика юлларында өч меңнән артык юл-транспорт һәлакәте теркәлгән, аларда 345 кеше һәлак булган. Кызганычка каршы, юлларда тискәре тренд быел да дәвам итә», – диде Алексей Песошин.

Нәтиҗә ясап, Татарстан Республикасы Премьер-министры «барлык дәрәҗәдәге хакимият органнарының төп бурычы иҗтимагый-сәяси тотрыклылыкны, халыклар бердәмлеген тәэмин итү, гражданнарның ышанычын киләчәктә дә ныгыту.

Алда мөһим сәяси вакыйга – тугызынчы чакырылыш Россия Федерациясе Дәүләт Думасына депутатлар сайлаулар. Безнең бурыч республикада сайлауларны уңышлы уздыруны тәэмин итү һәм ил парламентында Татарстанның лаеклы вәкиллеген саклап калу. Бу киләчәктә дә республика мәнфәгатьләрен федераль дәрәҗәдә нәтиҗәле якларга мөмкинлек бирәчәк».

Моннан тыш, 2026 елда безнең республика күп кенә колачлы чараларның үзәгенә әвереләчәк. Казан Ислам дөньясының мәдәни башкаласы дип игълан ителде, елны рәсми ачу тантанасы «Россия – Ислам дөньясы: KazanForum» халыкара икътисадый форумы кысаларында узачак.

«15 февральдә без патриот-шагыйрь, Советлар Союзы Герое Муса Җәлилнең тууына 120 ел тулуны билгеләп үттек, юбилей чаралары ел дәвамында дәвам итәчәк. Шулай ук быел Габдулла Тукайның 140 еллыгын һәм башка күренекле шәхесләрнең – илебез мәдәнияте символларының юбилейларын билгеләп үтәчәкбез. Әлеге вакыйгалар кысаларында булачак чаралар халыклар бердәмлеге елъязмасының якты битләре булыр дип ышанам.

Сезнең район киләчәктә дә икътисадый үсеш темпларын арттыру һәм гражданнарның тормыш сыйфатын яхшырту өчен барлык кирәкле ресурсларга ия. Сезгә уңышлар телим!» – диде Алексей Песошин чыгышының азагында.

Аннары Лениногорск муниципаль районының аеруча тырыш хезмәтчәннәренә дәүләт бүләкләре тапшырылды, диелә ТР Рәисе Матбугат хезмәте хәбәрендә. 

БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!