24 июль 2026 Яңалыклар

Белгеч бакчачылык ширкәтендәге җир кишәрлегенә газ үткәрү программасы буенча аңлатма бирде

Бакчачылык ширкәтендә торак йортыбыз бар. Хәзер республикада дәүләт программасы буенча бакчачылык ширкәтендәге җир кишәрлегенә кадәр бушлай газ үткәрәләр дип беләм. Әлеге программада катнашу өчен нәрсә эшләргә кирәк? Гөлсинә ХУҖИНА. Югары Ослан

Росреестрның Татарстандагы идарәсе матбугат хезмәте:

– Газлаштырып бетерү программасында катнашу өчен түбәндәге шартлар үтәлергә тиеш:

*бакчачылык ширкәте торак пункт чикләрендә урнашкан булырга;

*торак пунктка кадәр зәңгәр ягулык кергән яки газлаштыру программасы кысасында агымдагы елда бакчачылык ширкәте чикләренә кадәр газүткәргеч торбалар үткәрү каралган булырга.

*бакчачылык ширкәтләрен газлаштырып бетерү план-графиклары җирле хакимият органнары тарафыннан расланырга;

*торак йортка милек хокукы рәсмиләштерелгән булырга.

Соңгысы булмаган очракта, Росреестрга мөрәҗәгать итү өчен гариза, техник план һәм җир кишәрлегенә хокукны раслый торган документ кирәк булачак. Шунысы да бар: йорт барлык төзелеш нормаларына туры килергә һәм ел әйләнәсе яшәү өчен яраклы булырга тиеш.

БЕЗНЕҢ МАКС КАНАЛЫНА ЯЗЫЛЫГЫЗ!