Бүген «Татнефтехиминвест-холдинг» АҖ Директорлар Советы утырышы узды

Утырышны холдингның Директорлар советы рәисе, Татарстан Рәисе Рөстәм Миңнеханов үткәрде. Чарада ТР Премьер-министры Алексей Песошин да катнашты.

Татарстан нефть-газ химиясе форумы-2026га әзерлек һәм аны уздыру турындагы нотык белән Татарстан Республикасы Премьер – министры урынбасары - Татарстан Республикасы сәнәгать һәм сәүдә министры Олег Коробченко чыгыш ясады.

Татарстан нефть-газ химиясе форумы-2026 26-28 августта «Казан Экспо»ХКҮ мәйданчыгында узачак. Форумның эшлекле программасын оештыручылар-республика министрлыклары һәм ведомстволары, «Сибур» компанияләре, «Газпром трансгаз Казан», «Татнефтехиминвест-холдинг», Россия нефть-газ сәнәгатьчеләре берлеге, шулай ук КФУ, КНИТУ-КАИ, КДЭУ, АГНИ, КДАТУ югары уку йортлары һәм башкалар. Фәнни-техник конференцияләр, түгәрәк өстәлләр, тәэмин итүчеләр көннәре, махсуслаштырылган күргәзмә, пленар утырыш планлаштырыла.

Татарстан нефть-газ химиясе форумы инде 33 нче тапкыр уздырыла. Узган 2025 елда ул 4 илдән, Россиянең 20дән артык төбәгеннән 10 меңнән артык катнашучыны җыйган иде, өч көн эчендә 39 төрле чара үткәрелде.

Рөстәм Миңнеханов ТНГФ-2026ны югары дәрәҗәдә оештырырга һәм уздырырга, эшлекле программа әзерләргә кушты.

Екатеринбургтан «Прософт-Система» («Реглаб» ДК) генераль директоры Андрей Ульянов сәнәгать предприятиеләре өчен Россия автоматикасы эшләнмәләрен тәкъдим итте. «Реглаб» дәүләт корпорациясе - критик сәнәгать инфраструктурасын автоматлаштыру системалары өчен җайланмалар эшләүче һәм җитештерүче. Автоматлаштыру базарында - 2011 елдан бирле.

Компания үз кадрларын әзерләү һәм квалификация күтәрү белән кызыксына. Әйдәп баручы техник югары уку йортлары һәм урта һөнәри белем уку йортлары белән бергә инженерлар һәм программистлар әзерләү программаларын үстерү бара. 2026 елның апрелендә КФУда «Реглаб» җайланмалары базасында сәнәгый автоматлаштыру буенча махсуслаштырылган лаборатория ачылды.

Татарстанда эшли торган компанияләр арасында «Реглаб» җайланмаларын «Татэнерго», ТАНЕКО, ТАИФ-НК, Шешма-ойл һәм башкалар куллана.

Рөстәм Миңнеханов сәнәгать предприятиеләрендә автоматлаштыру кебек юнәлешләрне алга этәрергә кушты. Аның сүзләренчә, бүген процессларны автоматлаштыру өчен җайланмалар төрле өлкәләрдә кулланыла.

ICL Техно генераль директоры Евгений Степанов компания һәм предприятиеләр белән багланышлар турында сөйләде.

Сәнәгать челтәрләренең торышына цифрлы контроль проектын «Биометриклабс» ҖЧҖ генераль директоры Алексей Фролов тәкъдим итте.

AVAtech компаниясе - эшкәртү сәнәгате өчен стандарт булмаган сәнәгать җайланмаларын эшләүче һәм җитештерүче турында «Аватех ЗД» (Түбән Новгород) генераль директоры Василий Воробьев сөйләде. Компаниянең инде 50дән артык гамәлгә ашырылган проекты, 20дән артык эре заказ бирүчесе бар. Аның продуктлары һәм хезмәтләре арасында-автоматлаштырылган җыю линияләре, автоматлаштырылган пресслар, йөк күтәрү җайланмалары һәм башка юнәлешләр.

AVAtech компаниясе эшчәнлеген киңәйтергә планлаштыра һәм Татарстанны төп төбәк буларак карый. Инженерлык һәм җитештерү бүлекчәләрен ачу күздә тотыла, «Иннополис» МИЗ мәйданчык буларак карала. Компаниянең планнарында – республика предприятиеләре белән элемтәләрне киңәйтү.

Татарстан Рәисе Рөстәм Миңнеханов ассызыклаганча, бүген тәкъдим ителгән барлык проектлар һәм юнәлешләр төбәкнең сәнәгать секторын алга таба үстерү өчен мөһим. Ул һәр компания белән хезмәттәшлек мөмкинлекләрен әйбәтләп өйрәнергә кушты.

Сүз уңаеннан, хәзерге вакытта «Нәтиҗәле конкурентлыкка сәләтле икътисад» илкүләм проекты гамәлгә ашырыла.

БЕЗНЕҢ МАКС КАНАЛЫНА ЯЗЫЛЫГЫЗ!