Хәзер 14 яшькә кадәрге баланың ата-анасы тулы булмаган эш вакытын билгеләү үтенече белән эш бирүчегә мөрәҗәгать итә ала. Әмма бу очракта хезмәт хакы да кими. Селезнев фикеренчә, мондый вариант барлык гаиләләргә дә туры килми.
Депутат билгеләп үткәнчә, ата-аналарның эш көне еш кына эштәге һәм юлда үткән вакытны гына түгел, ә балаларны мәктәптән яки бакчадан алу, түгәрәкләргә йөртү һәм өй эшләрен эшләргә булышу ихтыяҗын да үз эченә ала. Шуңа күрә ул балигъ булмаган балаларның ата-аналарына, элеккеге хезмәт хакы күләмен саклап, атнага өстәмә рәвештә ике сәгать бирергә тәкъдим итте.
Элегрәк депутатлар Дәүләт Думасына балигъ булмаган балаларның ата-аналары өчен кыскартылган эш вакыты турындагы закон проектын тапшырган иде. Документта алар өчен хезмәт хакын саклаган хәлдә 39 сәгатьтән артык булмаган эш атнасы билгеләргә тәкъдим ителә.
Әлеге закон проекты гаиләләр өчен тагын бер чараны күздә тота. Ике һәм аннан да күбрәк балигъ булмаган балалары булган ата-аналарга өч айга бер тапкыр түләнә торган бер өстәмә ял көне бирергә тәкъдим ителә. Мондый көннәрне берьюлы кулланырга түгел, ә тупларга мөмкин булачак.
Селезнев өстәмә ирекле сәгатьләр һәм түләнә торган ял көннәре гаиләләрнең көндәлек тормыш шартларын үзгәртү мөмкинлеген тудырачак һәм ата-аналар балаларга күбрәк вакыт бүлеп бирәчәк дип саный. Ул коллегаларын бу норманы хупларга чакырды.
Сүз уңаеннан, хәзерге вакытта Татарстанда «Гаилә» илкүләм проекты гамәлгә ашырыла.
БЕЗНЕҢ МАКС КАНАЛЫНА ЯЗЫЛЫГЫЗ!
Фикер өстәү
Фикерегез