Татарстанда яшь һәм күп балалы гаиләләргә ярдәм итүгә юнәлдерелгән күптөрле программалар гамәлгә ашырыла. Мондый ярдәм гаилә кору турында ныклы карар кабул итү өчен уңайлы шартлар тудыра, дип хәбәр итте «Татар-информ» агентлыгына ТР Министрлар Кабинетының ЗАГС идарәсе җитәкчесе Эльвира Әхмәтова.
«Республикада яшь һәм күп балалы гаиләләргә ярдәм күрсәтүгә юнәлдерелгән төрле программалар гамәлгә ашырыла. Бу гаилә кору турында ныклы карар кабул итү өчен уңайлы шартлар тудыра. Бүгенге көндә күпчелек яшьләр өчен никахны теркәү – матур, истә калырлык вакыйга гына түгел, ә зур җаваплылык та», - диде Әхмәтова.
Ул билгеләп үткәнчә, Татарстан гаиләләре элек-электән туганлык җепләренең нык булуы, өлкәннәргә хөрмәт һәм гаилә кыйммәтләрен хөрмәт итү белән аерылып тора. «Гаиләле кеше үзен якланган итеп тоя. Нык гаиләдә ир белән хатын бер-берсе өчен теләсә нинди хәлдә дә терәк була. Киләчәк буынның әхлак, мәдәният һәм дөньяга карашы нигезләре нәкъ менә гаиләдә салына. Бай гаилә традицияләре булган Татарстан өчен бу зур әһәмияткә ия», – дип сүзен төгәлләде спикер.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез