ТР Дәүләт Советы Рәисе Фәрит Мөхәммәтшин республиканың Югары Ослан районында булды һәм «Бердәм Россия» партиясенең Иҗтимагый ярдәм штабының «Баланы мәктәпкә җый» хәйрия акциясендә катнашты. Ул шулай ук балаларны якынлашып килүче яңа уку елы белән котлады һәм аларга уңышлар теләде.
ТР Дәүләт Советы матбугат хезмәте хәбәр иткәнчә, Мөхәммәтшин Иҗтимагый ярдәм штабының социаль проектларны гамәлгә ашырырга ярдәм итүче һәм хәйрия акцияләрендә катнашучы активистларына портфельләр һәм мәктәп өчен канцелярия кирәк-яраклары тапшырган. Ул шулай ук балалар белән аралашкан, аларның нәрсә белән мавыгулары һәм буш вакытларын ничек уздырулары турында сорашкан.
Бүләкләнүчеләр арасында Балалар сәнгать мәктәбендә укучы Анастасия дә бар. Настя рәсем ясау, сәйлән үрү, бәйләү һәм чигү белән актив шөгыльләнә. Аның эшләрен еш кына сәнгать мәктәбе укытучылары билгеләп үтә. Штабта Анастасия башка балалар өчен мастер-класслар үткәрә.
Штабның тагын бер активисты – Павел. Ул 182нче номерлы политехник лицейның футбол командасы капитаны. Аның җитәкчелегендә команда зур нәтиҗәләргә ирешкән, балалар һәм яшүсмерләр командалары арасында узган Allstars турнирында икенче урын яулаган. Павел профессиональ футболчы булырга, «Рубин» командасында уйнарга һәм Татарстанны тәкъдим итәргә хыяллана.
Ильяс – «ТР Яшь гвардиясе» белән берлектә Иҗтимагый ярдәм штабы оештырган киберфутбол буенча ике зур турнирда җиңүче. Ул киләчәген киберспорт белән бәйләргә тели һәм инде бүгеннән үк зур уңышларга ирешә.
Сүз уңаеннан, хәзерге вакытта Татарстанда “Яшьләр һәм балалар” илкүләм проекты гамәлгә ашырыла.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез