Дәүләт Советы Рәисе, Татарстан Волейбол федерациясе президенты Фәрит Мөхәммәтшин «Зенит-Казан» волейбол клубы президенты Рәфкать Кантюковка һәм команданың баш тренеры Алексей Вербовка котлау телеграммасы юллады. Ике көн элек Татарстанның ир-атлар волейбол командасы Санкт-Петербургның «Зенит» командасы белән матчта унөченче мәртәбә Россия чемпионатының алтын медальләрен яулады.
«Татарстан Республикасы волейбол федерациясе һәм шәхсән үз исемемнән «Зенит-Казан» волейбол клубы командасы җитәкчелеген, уенчыларын һәм тренерларын ир-атлар командалары арасында Россия чемпионатында ышанычлы җиңүләре белән котлыйм, – диелә телеграммада. – Унөченче тапкыр илкүләм турнирда җиңеп, Россиянең иң титуллы волейбол клубы тагын бер тапкыр тырыш хезмәт, көчле характер, үҗәтлек һәм команда рухы уңышның төп чыганагы булуын исбатлады».
Фәрит Мөхәммәтшин командага, тренерларга, клуб белгечләренә осталыклары, нәтиҗәгә ышанычлары һәм күпсанлы тамашачыларга һәм җанатарларга бүләк ителгән якты хисләре өчен рәхмәт белдереп, «Зенит-Казан» клубы коллективына нык сәламәтлек, тынычлык һәм иминлек, яңа спорт үрләрен яулауда уңышлар теләде.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез