05 гыйнвар 2026 Яңалыклар

Һава торышында кискен үзгәрешләр: буран, яңгыр һәм +4 градус җылы көтелә

6 гыйнвар төнендә Татарстанның күпчелек районнарында кар явачак, урыны белән буран чыгуы ихтимал. Бу хакта республика Гидрометеорология һәм әйләнә-тирә мохитне күзәтү идарәсе хәбәр итә.

Төнлә температура -6..-11 градуска кадәр төшәчәк, көндез -3..-8 градус булачак. Юлларда бозлавык һәм кар көртләре барлыкка килергә мөмкин.

Чәршәмбе, 7 гыйнварда, чираттагы циклон якынлашу белән һава шартларының начарлануы көтелә. Төнлә көнбатыш районнарда урыны белән кар явачак, көндез республика буенча кар явуы, буран чыгуы көтелә. Төнлә һава температурасы -9..-14 градус, көндез -4..-9 градус булыр дип фаразлана.

Пәнҗешәмбе һәм җомга көннәрендә, 8-9 гыйнварларда, көньяк циклон тәэсирендә республикада җепшек кар, яңгыр явачак. Кайбер районнарда буран көтелә, юлларда бозлавык хасил булачак. Җил секундына 15-17 метрга кадәр көчәя. Төнлә температура -5..-10 градус булса, көндез +1..+4 градуска кадәр җылытачак. Юлларда бозлавык һәм урыны белән кар көртләре сакланачак.

БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!