15 ноябрь 2025 Яңалыклар

Ялларда һава торышы нинди булачак?

Шимбә көнне Казанда җылы һава торышы (+5..+7 градус) саклана, әмма яңгыр явачак. Көньяк-көнбатыштан искән җилнең тизлеге секундына 5-10 метр тәшкил итәчәк, ә атмосфера басымы җомга белән чагыштырганда терекөмеш баганасының 743 миллиметрына кадәр түбәнәячәк, дип хәбәр итте «Татар-информ» агентлыгына «МЕТЕО» фаразлау үзәге синоптигы Александр Ильин.

«Әмма алга таба антициклон килә һәм температура түбәнәюен дәвам итәчәк. Якшәмбегә каршы төндә Татарстан башкаласында һава температурасы 0..-2 градус тәшкил итә, яңгыр җепшек карга әйләнә. Әмма якшәмбе көндез явым-төшем туктый һәм кояшлы һава торышы (0 градус тирәсе) урнаша. Юлларда бозлавык барлыкка килүе ихтимал. Көньяк-көнбатыштан искән җилнең тизлеге кимеп, секундына 4-5 метр тәшкил итәчәк, ә атмосфера басымы терекөмеш баганасының 750-752 миллиметрына кадәр күтәреләчәк», – диде синоптик.

Гомумән алганда, шимбә көнне республикада һава температурасы +3..+6 градус тәшкил итә. Шулай ук яңгыр ява, ул якшәмбегә каршы төндә карлы яңгырга әйләнәчәк. «Якшәмбе иртәсенә Татарстанда -1..-3 градуска кадәр суыта. Көндез температура 0..-2 градуска кадәр күтәреләчәк. Шулай ук якшәмбе иртәсендә республикада җепшек кар явачак. Көндез исә явым-төшем көтелми», – дип хәбәр итте белгеч.

БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!