«Сезнең сүз яшьләргә үтә, сезне ишетәләр». Яшьләр парламентының уникенче утырышында Дәүләт Советы Рәисе Фәрит Мөхәммәтшин әнә шулай диде. Утырышта узган ел башкарылган эшләргә йомгак ясалды һәм киләчәккә бурычлар билгеләнде.
– Яшьләр алдында сүзегез үтемле, дәрәҗәгез зур. Шуңа күрә сез бердәмлек үрнәген күрсәтергә тиеш. Бу март аенда булачак Россия Президентын сайлаулар һәм сентябрьдәге Дәүләт Советы депутатларын сайлаулар башланыр алдыннан аеруча мөһим, - диде Фәрит Мөхәммәтшин яшь парламентарийларга. – Яшьләргә аңлату эшенә актив кушылырга, сайлау кампанияләренең мөһимлеге турында сөйләргә кирәк. Бу бигрәк тә беренче тапкыр тавыш бирүчеләргә кагыла. Сез укуда да, эштә дә, иҗтимагый-сәяси тормышта да алдынгы булырга тиеш.
Парламент җитәкчесе сүзләренә караганда, республиканың социаль-икътисадый үсешендә яшьләрнең роле зур.
– Хәзерге катлаулы вазгыятьтә безгә бурычларны бергәләп хәл итәргә һәм республика үсеше темпларын саклап калырга кирәк. Татарстан сәнәгать җитештерүе, авыл хуҗалыгы, төзелеш һәм социаль-икътисадый үсеш буенча Россия төбәкләре арасында алдынгы позицияләрдә тора. Бу уңышларда яшьләребезнең дә өлеше зур. Актив гражданлык позициягез өчен рәхмәт сезгә, - диде Фәрит Мөхәммәтшин.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез