Екатеринбургта бер ир-ат банк картасын банкомат аша тулыландырырга теләгән, әмма җайланмадагы хата аркасында 180 мең сумга якын акчасыннан колак каккан. Бу хакта E1.RU хәбәр итә.
Басма мәгълүматлары буенча, вакыйга 1 октябрьдә булган. Шәһәрдә яшәүче ир-ат дебет картасына 150–180 мең сум акча кертергә теләгән. Банкомат операцияне эшкәртә башлаган, аннары төзексезлек турында хәбәр күрсәткән. Әмма акчаны кире кайтармаган һәм ир-ат сүзләренчә, аларның исәбенә дә күчмәгән.
Ир-ат шунда ук банкка мөрәҗәгать иткән. Анда аның гаризасын карарга вәгъдә иткәннәр, әмма әлегә җавап бирмәгәннәр.
Басма искәртүенчә, мондый очракларда акча гадәттә берникадәр вакыттан соң кире кайтарыла. Әмма төгәл сроклар законда күрсәтелмәгән. Банк йөкләмәләрен «акыллы срокта» үтәргә тиеш, ә ул гадәттә ике атна чамасы тәшкил итә.
Элегрәк НИУ ВШЭ юридик факультеты деканы Вадим Виноградов банкоматтагы хата аркасында акча бирелмәгән очракта аны ничек кайтарырга кирәклеген аңлаткан. Аның сүзләренчә, Россия эчендәге операцияләрне карау вакыты 30 көннән, ә халыкара операцияләрне карау вакыты 60 көннән артмаска тиеш.
БЕЗНЕҢ МАКС КАНАЛЫНА ЯЗЫЛЫГЫЗ!
Фикер өстәү
Фикерегез