Илсур Метшин сүзләренчә, дөньякүләм масштабтагы олимпиадаларда Казан укучылары 2025 елда 6 алтын һәм 3 көмеш медаль яулаган. Бөтенроссия олимпиадаларында – 162 призлы урын (бу – Татарстанның барлык медальләренең 61 проценты). Узган ел олимпиадаларда Казанның 17 мең 299 укучысы катнашкан. Чагыштыру өчен: 2005 елда катнашучылар саны 2 мең 439 гына булган. Призлы урыннарга 31 бала лаек дип табылган. 100 мең кешегә исәпләгәндә, фән олимпиадаларында җиңүчеләр саны буенча Казан бүген Мәскәүдән кала икенче урында тора. Моннан тыш 2025 елда чыгарылыш сыйныф укучыларының 82 се, ягъни БДИда 100 балл җыйган балаларның 60 процентка якыны Казан югары вузларына укырга кергән.
Казан мәгариф системасына рекордлы санда яшь белгечләрне җәлеп итүе белән дә мактана ала. Үткән елда Россиянең – 55 һәм чит илләрнең өч югары уку йортыннан 460 педагог эшкә килгән.
– Без укытучы һөнәренең абруен күтәрү буенча эзлекле рәвештә эшлибез, Казан мәктәпләренә талантлы, яшь педагоглар килсен һәм системада озакка калсын өчен шартлар тудырабыз. Яшь укытучылар грантлар рәвешендә ярдәм ала. Бүген Казанның һәр өченче укытучысы 35 яшьтән яшьрәк һәм әлеге күрсәткеч Россиядәге уртача дәрәҗәдән югарырак. Безнең өчен бу принципиаль: мәктәпләргә яңа буын педагоглар килә, алар шәһәрнең мәгариф системасын үстерүгә үз өлешләрен кертә, – дип билгеләп үтте Илсур Метшин.
Моннан тыш шәһәр башлыгы мәгариф хезмәткәрләре йорты төзелешенең ахырына якынлашуын әйтеп куандырды.
– Ул компетенцияләрне үстерү, уртак белем бирү, тәҗрибә уртаклашу һәм көчле һөнәри бергәлекләр формалаштыру үзәгенә әверелергә тиеш. Скверны төзекләндерү эшләре дә туктап тормый, анда тиздән укытучыга һәйкәл куелачак, – диде Илсур Метшин.
Сүз уңаеннан, хәзерге вакытта Татарстанда «Яшьләр һәм балалар» илкүләм проекты гамәлгә ашырыла.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез