Казанда җиңел машина йөк машинасына бәрелеп янган: бер кеше һәлак булган

Казан янында трассада чит ил машинасы һәм йөк машинасы катнашында юл-транспорт һәлакәте булган. Audi автомобиле йөртүчесе һәлак булган. Бу хакта «Татарстан-24» хәбәр итә.

Авария Мамадыш һәм Вознесение трактлары арасындагы юлда килеп чыккан. Шаһитлар сүзләренчә, Audi зур тизлектә машиналар арасыннан хәрәкәт иткән һәм йөк машинасы прицепына килеп бәрелгән.

Җиңел автомобиль прицеп астында калган һәм яна башлаган. Машина йөртүчене салоннан ут сүндерелгәннән соң гына чыгара алганнар. Вакыйга шаһитлары MAN йөк машинасы йөртүчесенә прицепны тягачтан аерырга ярдәм иткән. Бу утның машинага таралуын булдырмас өчен эшләнгән.

Һәлак булган кешенең шәхесе һәм авариянең сәбәпләре ачыклана. Юл-патруль хезмәте хезмәткәрләре тикшерү үткәрә.

БЕЗНЕҢ МАКС КАНАЛЫНА ЯЗЫЛЫГЫЗ!