Мәрҗани мәчетендә Оман Солтанатлыгының мирасына багышланган халыкара күргәзмә ачылды

Мәрҗани мәчетендә Оман Солтанатлыгының бай рухи һәм мәдәни мирасына багышланган халыкара күргәзмә ачылды. 

Күргәзмә Изге Коръән аятьләре уку белән ачылды.

Татарстан мөфтие Камил хәзрәт Сәмигуллин, күргәзмәдә катнашучыларны сәламләп, Оман Солтанатлыгының Дин эшләре һәм вакфлар министры д-р Мөхәммәд бин Сәид Әл-Мамариның Оман мәдәнияте, илнең Коръән өйрәнү юнәлешендәге традицияләре, наху фәненә нигез салган оман галимнәре белән таныштыруын искә алды.

 - Болар барысы да безнең игътибарыбызны җәлеп итә һәм бу илләр белән тагын да якыннан танышырга этәргеч бирә. Монда Чечен Республикасыннан, Казахстаннан, Ираннан килгән һәр кунакның – үз йөзе һәм үз мәдәнияте бар. Аларның халкы глобализациягә дучар булмады, үз традицияләрен саклап калды, - диде мөфти. 

Оман Солтанатлыгының Дин эшләре һәм вакфлар министры д-р Мөхәммәд бин Сәид Әл-Мамари, Татарстан Рәисе Рөстәм Миңнехановка, кунакчыллыгы һәм гомумикешелек кыйммәтләрен ныгытуга һәм Россия белән ислам дөньясы арасындагы хезмәттәшлеккә игътибар күрсәткәне өчен рәхмәт белдерде. Әлеге халыкара күргәзмәне халыклар арасындагы тынычлык, үзара хөрмәт саклау һәм иң тәҗрибә алмашуны максат иткән гуманитар проект, дип атады ул. 

Татарстан Рәисе ярдәмчесе Марат Гатин кунакларны «Россия – Ислам дөньясы» Стратегик күзаллау төркеме исеменнән сәламләде һәм Оман белән Россия, шул исәптән Татарстан, арасындагы дипломатик бәйләнешләрне үстерүнең әһәмиятен билгеләп, яқын арада барлык килешүләр практик яссылыкка күчәчәгенә өмет белдерде. 

- Бу күргәзмә дә безнең бәйләнешләребезне үстерүгә үз өлешен кертә. Камил хәзрәт билгеләп үткәнчә, без бер-беребезне яхшырак белә башладык, – диде Марат Гатин. Ул Россиянең һәм Татарстанның оманлылар өчен ачык икәнлеген искәртте.

Күргәзмә Казанның мәдәни тормышындагы үзенчәлекле вакыйга булып тора. Гаҗәеп Оман иленең тарихы, мәдәнияте һәм традицияләре белән танышу өчен менә дигән мөмкинлек тә бу. Анда Оман Солтанатлыгы үсешенең тарихи этаплары, дөнья мәдәниятенә керткән өлеше, дини тормыш үзенчәлекләре һәм архитектура традицияләре белән танышырга мөмкин.

"Мәрҗани" мәчетендәге күргәзмәгә 29-30 ноябрь көннәрендә эшлиячәк. Керү ирекле.

ФОТО: Илдар Мөхәммәтҗанов

БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!