Чара Казан Ратушасында узды. Анда Россия, Беларусь, Казахстан, Кыргызстан, Таҗикстан эчке эшләр министрлыклары делегацияләре катнашты.
Рөстәм Миңнеханов билгеләп үткәнчә, мондый мөһим чараны уздыру – республика өчен зур дәрәҗә һәм җитди җаваплылык. "Татарстан гадәттәгечә эре халыкара һәм дәүләтара очрашулар өчен мәйданчык булып тора. Бүген без янә кунакчыл территория генә түгел, ә коллектив иминлекне ныгытуга һәркемнең өлеше мөһим булган уртак эштә актив катнашучы булырга әзер булуыбызны раслыйбыз", - диде ул.
Татарстан Рәисе ассызыклаганча, наркотикларның законсыз әйләнешенә каршы тору - дәүләт чикләрен белми торган бурыч. Наркобизнес яңа шартларга бик тиз яраклаша: маршрутларны үзгәртә, цифрлы технологияләр куллана, үз эшчәнлеген легаль схемаларга яшерә. Бу мәсьәләләргә оператив мәгълүмат алмашуга, куркынычларны анализлауның бердәм методикаларына һәм хокукый механизмнарны синхронлаштыруга таянып кына каршы торырга мөмкин, диде Рөстәм Миңнеханов.
Утырышның көн тәртибенә наркотиклар базарының яңа тенденцияләре турында фикер алышу, уртак операцияләрнең нәтиҗәлелеген анализлау керә. "Ышанам, фикер алышу безгә янауларның тулы картинасын күрергә һәм якын киләчәктә үк сизелерлек нәтиҗә бирәчәк конкрет гамәлгә ашырыла торган адымнарны формалаштырырга мөмкинлек бирәчәк. Без наркобизнеска каршы халыкара көрәш тәҗрибәсен куллану белән кызыксынабыз", - дип йомгаклады республика Рәисе сүзен.
ОДКБ әгъзалары булган дәүләтләрнең КСОПН рәисе, Россия Эчке эшләр министры урынбасары Андрей Храпов наркотиклар таралу куркынычы трансмилли характерда булуын сөйләде. "Каршылык оешманың барлык илләренең көчләрен берләштерүне таләп итә, бу хәлнең үзгәрүенә алдан ук әзер булырга, наркотрафик каналларын нәтиҗәле ябарга һәм безнең дәүләтләрне ышанычлы яклауны тәэмин итәргә мөмкинлек бирәчәк», - дип ассызыклады Андрей Храпов.
Коллектив куркынычсызлык турындагы килешү оешмасы Генераль секретаре урынбасары Валерий Семериков наркотикларның законсыз әйләнеше өлкәсендә ОДКБ җаваплылыгы зонасындагы вәзгыятьнең контрольдә тотылуын билгеләп үтте. "Әмма наркокуркыныч дәрәҗәсе саклана. Коллектив куркынычсызлык төбәкләрендә вәзгыятьнең катлаулануының төп гомуми факторлары: синтетик наркотиклар әйләнешен киңәйтү, наркобизнеста мәгълүмати һәм яңа финанс технологияләрен киң куллану һәм башкалар", - дип билгеләде Валерий Семериков.
Чара бергәләп фотога төшү белән тәмамланды.
БЕЗНЕҢ МАКС КАНАЛЫНА ЯЗЫЛЫГЫЗ!
Фикер өстәү
Фикерегез