Рөстәм Миңнеханов билгеләп үткәнчә, быелның 1 кварталында республиканың берләштерелгән бюджетына керемнәр күләме 147,4 млрд сум яисә еллык планның 22,2%ы, шулардан үз керемнәре – 135,4 млрд сум. Үз керемнәренең узган ел дәрәҗәсенә карата кимүе 4,7 млрд сум тәшкил итә. Төп сәбәп – узган елның 1 кварталына табышка салым буенча түләүләрнең 13,6 млрд сумга кимүе.
Татарстан Рәисе тармак министрлыкларына салым органнары, Икътисад министрлыгы һәм Финанс министрлыгы белән берлектә, килеп туган хәлгә анализ ясарга, бюджетка төп түләүләрне тәэмин итүче предприятиеләрнең җитештерү күрсәткечләрен дә кертеп, авырлыклар кичергән һәр салым түләүченең эшчәнлеген карарга, ярдәм чараларын кулланырга, шул исәптән федераль министрлыклар һәм ведомстволар белән хезмәттәшлектә предприятиеләргә ярдәм күрсәтергә кушты. Максат – предприятиеләр эше һәм җитештерүне үстерү өчен шартлар тудыру.
«Шул ук вакытта бюджетны тулыландыру өчен иң мөһим резерв – салым бурычы. 1 апрельгә ул 14,7 млрд сум тәшкил итә. Аны кыскарту буенча чараларны дәвам итәргә кирәк – әлеге тема даими рәвештә игътибар үзәгендә булырга тиеш», – дип ассызыклады Рөстәм Миңнеханов.
Ул билгеләп үткәнчә, агымдагы елга республика бюджетында шактый зур кытлык каралган. Агымдагы шартларда бюджетның нисбәтлелеген, беренчел һәм социаль әһәмияткә ия йөкләмәләрне тулысынча үтәүне, чыгымнарның нәтиҗәлелеген күтәрү эшен көчәйтүне дә кертеп, бюджет-финанс дисциплинасын төгәл үтәүне тәэмин итү мөһим.
«Муниципалитетларга игътибар итәм: акчаларны тоту турында яңа карарлар кабул иткәндә аларны реаль финанслау чыганаклары белән тәэмин итәргә кирәк. Финанс министрлыгына мәсьәләне даими контрольдә тотарга кирәк», – диде республика Рәисе.
Рөстәм Миңнеханов федераль акчаларны үзләштерүгә аерым игътибар бирде. Илкүләм проектлар кысаларында акчаларны үзләштерү быелның 1 кварталында 17,2% тәшкил итә, федераль акчалар буенча – 16,2%.
Татарстан Рәисе планлаштырылган срокларда федераль бюджет акчалары хисабына, илкүләм проектларны да кертеп, контрактлар һәм килешүләр төзергә кирәклеген билгеләп үтте.
Эш Татарстан Республикасы Авыл хуҗалыгы һәм азык-төлек министрлыгы, Татарстан Республикасы Сәламәтлек саклау министрлыгы, Туризм буенча Татарстан Республикасы дәүләт комитеты, Татарстан Республикасы Икътисад министрлыгы, Татарстан Республикасы Цифрлы үсеш министрлыгы, Татарстан Республикасы Сәнәгать һәм сәүдә министрлыгы, Татарстан Республикасы Мәдәният министрлыгы, Татарстан Республикасы Хезмәт, халыкны эш белән тәэмин итү һәм социаль яклау министрлыгы, Татарстан Республикасы Яшьләр эшләре министрлыгы, Татарстан Республикасы Мәгариф һәм фән министрлыгы тарафыннан тәмамланмаган. «Федераль үзәк белән килешүләрдә салынган барлык параметрлар да тулы күләмдә ирешелергә тиеш», – диде Татарстан Республикасы Рәисе.
Шулай ук Рөстәм Миңнеханов федераль финанслашу өчен ирекле лимитлар барлыкка килгән очракта Татарстан объектларын һәм чараларын илкүләм проектларга кертү буенча актив эш алып барырга өндәде.
Ул искәрткәнчә, ил Президенты кушуы буенча федераль дәрәҗәдә төбәкләрнең бюджет кредитлары буенча бурычларының өчтән ике өлешен исәптән чыгару гамәлгә ашырыла. Бушаган акчалар коммуналь, транспорт һәм инвестиция инфраструктурасын модернизацияләүгә тотыла. «Татарстан Республикасы Төзелеш, архитектура һәм торак - коммуналь хуҗалык министрлыгына, Татарстан Республикасы Транспорт һәм юллар хуҗалыгы министрлыгына, Татарстан Республикасы Икътисад министрлыгына, Татарстан Республикасы Финанс министрлыгы белән берлектә, бюджет кредитлары буенча бурычларны кичерү өчен планлаштырылган барлык чараларны гамәлгә ашыруны тәэмин итәргә кирәк», - дип өстәде Рөстәм Миңнеханов.
БЕЗНЕҢ МАКС КАНАЛЫНА ЯЗЫЛЫГЫЗ!
Фикер өстәү
Фикерегез