Овчарова “КазанФорум”да: “Россиядә фәкыйрьлек проблемасы хәл ителде”

Россиядә фәкыйрьлек проблемасы хәл ителде. Бу хакта XVII “Россия – Ислам дөньясы: КазанФорум”да журналистларга “Югары икътисад мәктәбе” илкүләм тикшеренү институты проректоры Лилия Овчарова әйтте.

“Соңгы ун елда илдә фәкыйрлек проблемасы кимеде һәм бик зур тизлек белән. Без моны башка илләр белән чагыштырып караганда да күрәбез: Россия фәкыйрьлек дәрәҗәсе түбән булган илләр рәтенә керә. Минем уйлавымча, бүген безнең алда башка мәсьәлә тора: фәкыйрьлек ул илнең иминлек дәрәҗәсен билгеләүче бердәнбер күрсәткеч түгел. Тормыш дәрәҗәсе икътисадый үсеш күзәтелгәндә генә мөмкин дип әйтәбез икән, бу – дөрес. Бүген урта сыйныфны киңәйтү – илнең иминлеге өчен төп бурыч”, – диде ул.

Лилия Овчарова сүзләренә караганда, 2000 нче еллар башында илдә яшәүчеләрнең өчтән береннән дә күбрәк өлешенең кереме яшәү минимумыннан түбәнрәк булса, бүген әлеге күрсәткеч 6 процент чамасы.

Билгеле булганча, XVII “Россия – Ислам дөньясы: КазанФорум” халыкара икътисадый форумы башкалада 12-17 майда уза. Россия Президенты Владимир Путин Указы нигезендә ул 2023 елдан федераль статус алды һәм Россиянең Ислам дөньясы белән хезмәттәшлегендә төп мәйданга әверелде.

БЕЗНЕҢ МАКС КАНАЛЫНА ЯЗЫЛЫГЫЗ!