Республика көнен бәйрәм итү кысаларында ТР Яшьләр эшләре министры Ринат Садыйков һәм төбәкнең ирекле җәмәгатьчелеге активистлары 2025 елда волонтерлык өлкәсендә «Мәрхәмәтле Татарстан» Республика премиясенең гариза кампаниясен тантаналы рәвештә башлап җибәрделәр. Бу хакта ТР Яшьләр министрлыгы матбугат хезмәте хәбәр итә.
Премиянең җиңүчеләре булып сәламәтлек саклау, экология, инклюзия, мәдәният, махсус хәрби операция уздыру зонасында ярдәм итү һәм башка юнәлешләр буенча республиканың волонтерлык бергәлеге лидерлары булачак. Ирекле эшчәнлекне оештыручылар, шул исәптән коммерциячел булмаган оешмалар, уку йортлары, бизнес вәкилләре бүләкләнәчәк. Волонтерлар өч юнәлеш буенча премиядә катнаша ала: «волонтерлар», «командалар», «бизнес». «Татарстан Республикасының Ел волонтеры» һәм «Елның героик гамәле» юнәлешләре аерым билгеләнә.
Социаль җаваплы шәхес тәрбияләү – «яшьләр һәм балалар» илкүләм проектының максатларының берсе, дип ассызыкладылар министрлыкта.
«Мәрхәмәтле Татарстан» премиясе – бөтен Республикага таныту һәм игелекне башкаларга күрсәтү өчен менә дигән мөмкинлек. Бу премия өчен юбилей елы. Биш ел рәттән Татарстан Республикасы Рәисе Рөстәм Миңнеханов ярдәме белән без республикабыз волонтерларын, дөньяны яхшырак итәргә теләүчеләрне бүләклибез», – диде Ринат Садыйков.
Премиянең гариза бирү кампаниясе быел 22 сентябрьгә кадәр дәвам итә. Гаризаны тапшырыр өчен сылтамага басарга кирәк. Бүләкләү тантанасы ел ахырында Татарстан җитәкчелеге катнашында узачак. Премия турындагы тулырак мәгълүмат белән рәсми сайтта танышырга мөмкин.
Быел ике яңа номинация кертелде: «инклюзия өлкәсендә Ел волонтеры» һәм «елның героик гамәле».
Волонтерлар казанышларына премиянең эксперт советы бәя бирәчәк, аңа республиканың профильле министрлыклары һәм ведомстволары вәкилләре, профильле ирекле берләшмә лидерлары һәм ТР иреклелек ресурс үзәге хезмәткәрләре керә. «Мәрхәмәтле Татарстан» премиясенең үзенчәлекле ягы булып бары тик шәхси казанышларга бәя бирү һәм республика оешмаларының иҗтимагый проблемаларын хәл итү тора, дип игътибар иттеләр ведомствода.
«Узган ел безнең өчен истәлекле булды, Татарстанның барлык 45 муниципалитетыннан 373 гариза җыйдык. Шунысын да билгеләп үтәргә кирәк, җиңүчеләребезнең эшчәнлеген яктырту өчен ел саен «РИМ» медиатөркеме белән берлектә мәгълүмати кампанияне гамәлгә ашырабыз, һәм Татарстан Республикасында билбордларда «Безнең заман геройлары» портретлары пәйда була», – дип сөйләде Татарстан Республикасы ихтыярыйлык мәгълүмати-ресурс үзәге башкарма директоры Айрат Мөбәракшин.
Премиянең дүртенче сезоны җиңүчесе элегрәк «Ярдәм янәшә!» активисты, гуманитар миссияләрдә һәм гуманитар ярдәм җыюда катнашучы Виктор Воропаев булды.
Премияне оештыручылар – ТР Яшьләр эшләре министрлыгы һәм «Татарстан Республикасы ихтыярыйчылык мәгълүмати-ресурс үзәге».
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез