ТР Премьер-министры урынбасары Ринат Садыйков Татарстан шефлыкка алган Лисичанск шәһәре хастаханәсендә булды. Ул баш табиб Елена Олексюк һәм башка хезмәткәрләр белән алдагы бурычлар, шулай ук медицина учреждениесе эшчәнлегенең өстенлекле юнәлешләре турында фикер алышты.
Ринат Садыйков республика ярдәме белән ремонт ясалган һәм заманча медицина җиһазлары урнаштырылган бүлекләрне карады. Аның сүзләренчә, матди-техник базаны ныгыту һәм пациентлар өчен шартларны яхшырту эше дәвам итәчәк.
Ринат Садыйков кадрлар кытлыгы булу турында да әйтеп үтте.
Хәзер төп бурыч – коллективны ныгыту, яңа белгечләр килүне тәэмин итү һәм урыннарда табибларга ярдәм күрсәтү, диде ТР вице-премьеры.
«Җиһазлар – хастаханә эшенең нигезе, әмма иң мөһим фактор – кеше капиталы. Биредә эшләүче белгечләр югары дәрәҗәле медицина ярдәмен күрсәтергә сәләтле. Бүген без төп өстенлекләрне билгеләдек һәм Татарстандагы коллегалар белән киләчәктә хезмәттәшлек итү турында килештек», – диде Ринат Садыйков.
Сүз уңаеннан, хәзерге вакытта Татарстанда “Кадрлар” илкүләм проекты гамәлгә ашырыла.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез