2027 елның 1 мартыннан Россиядә кредит оешмалары акча күчерүне вакытлыча туктату өчен яңа нигез алачак. Әгәр клиентның җайланмасында зарарлы программа тәэминаты ачыкланса, түләү башта тикшереләчәк һәм туктатылып торырга мөмкин. Бу хакта Дәүләт Думасының Финанс базары комитеты рәисе Анатолий Аксаков РИА Новостига хәбәр иткән.
Банк операцияне автомат рәвештә кире какмаячак. Клиенттан түләүне башкарырга ниятләвен раслау соралачак, шуннан соң акча күчерү билгеләнгән тәртиптә үткәрелергә мөмкин.
Зарарлы программаларны ачыклау өчен банкларга клиентның ризалыгы кирәк булачак. Яңа таләпләр гамәлдәге клиентларга да кагыла: кредит оешмалары алар белән төзелгән килешүләрне 2027 елның 1 сентябренә кадәр яңартырга тиеш.
Хәзер Россиядә клиент ризалыгыннан башка яки мошенниклар йогынтысында башкарылырга мөмкин булган акча күчерүләрнең 12 билгесе исәпкә алына. Алар арасында СБП аша бер банктагы үз счетыннан икенче банктагы счетка 200 мең сумнан артык акча күчереп, тәүлек эчендә аны өченче затка җибәрү дә бар.
Моннан тыш, 2027 елның сентябреннән Россиядәге барлык банклар клиентларга үз продуктлары һәм хезмәтләре турында тулырак мәгълүмат бирергә тиеш булачак. Карталар, акча күчерүләр һәм кредитлар буенча шартлар турындагы мәгълүмат банк бүлекчәләрендә, сайтларда һәм мобиль кушымталарда урнаштырылачак.
БЕЗНЕҢ МАКС КАНАЛЫНА ЯЗЫЛЫГЫЗ!
Фикер өстәү
Фикерегез