Рөстәм Миңнеханов: Эссе көннәрдә янгыннар һәм суда һәлакәтләр барлыкка килү куркынычы артты

Эссе көннәр урнашу сәбәпле, республикада янгыннар һәм суда һәлакәтләр барлыкка килү куркынычы артты. Моңа Татарстан Рәисе Рөстәм Миңнеханов ТР Хөкүмәте Йортында узган республика киңәшмәсендә игътибар итте.

Татарстанда янгын куркынычы югары дәрәҗәдә дип игълан ителде.  Агымдагы ел башыннан торак фондында 1716 янгын (узган елның шул ук чоры белән чагыштырганда 14%ка артык), шулай ук 465 ландшафт янгыннары булган. 62 кеше һәлак булган, шул исәптән 2 бала, 61 кеше төрле җәрәхәтләр алган.

"Гадәттән тыш хәлләр министрлыгы бүлекчәләренә, урманнарны янгыннан саклау бүлекчәләренә, муниципаль берәмлекләр башлыкларына гражданнарның йорт биләмәләрен карап чыгу һәм урман фондын патрульләү, халыкка көнкүрештә һәм табигатьтә янгын куркынычсызлыгының мәҗбүри таләпләре турында мәгълүмат бирү буенча эшне көчәйтергә кирәк. Мич һәм газ җайланмаларының, электр үткәргечләренең һәм электр приборларының торышына игътибар итәргә кирәк", - диде республика Рәисе.

Рөстәм Миңнеханов кыен тормыш хәлендә калган һәм социаль яктан куркыныч хәлдә булган күп балалы гаиләләргә ярдәм күрсәтергә өндәде. Аерым алганда, мич җылысын һәм электр үткәргечләрен тиешенчә ремонтлаганда, автоном янгын хәбәрчеләрен урнаштырганда ярдәм итәргә.

Шулай ук эссе көннәр аркасында суда ял итү сезоны башлана. Су объектларында, бигрәк тә балаларда иминлекне тәэмин итү максатларында, Татарстан Рәисе шәһәр һәм муниципаль пляжларны вакытында ачу чараларын күрергә, Гадәттән тыш хәлләр министрлыгы һәм Эчке эшләр министрлыгы бүлекчәләре белән берлектә, җыелма мобиль патруль төркемнәре эшен оештырырга кушты.

"Су объектлары янында һәм пляжларда массакүләм ял итү урыннарында вакытлыча коткару постлары булдырырга, республиканың ОСВОД ТИО территориаль бүлекчәләре әгъзалары кизү торырга тиеш.

Кешеләрне җиһазландырылмаган урыннарда һәм исерек хәлдә коенудан тыярга. Шулай ук балаларның һәрвакыт өлкәннәр күзәтүе астында булуы бик мөһим», - диде Рөстәм Миңнеханов.

Республика Рәисе ГИМС белгечләрен су объектларында кече суднолардан файдалану кагыйдәләренең үтәлешенә контрольне көчәйтергә чакырды.