РФ Хөкүмәте Рәисе урынбасары Дмитрий Чернышенко һәм Татарстан Рәисе Рөстәм Миңнеханов Жуков орденлы Кызыл Байраклы Казан югары танк команда училищесында булдылар.
Хәрби уку йорты территориясенә килгәч, РФ вице-премьеры һәм Татарстан Рәисе училищены тәмамлаган герой-танкистлар һәйкәленә чәчәкләр салды. Аннары курсантлар белән очраштылар. Рөстәм Миңнеханов укучыларны Ватанны саклаучы көне белән котлады. «Хәзерге шартларда бу бәйрәм аерым мәгънәгә ия. Бүген безнең ил җиңүгә омтыла. Һәм бу җиңү сугыш кырында булачак. Безнең солдатлар фронтта ил җитәкчелеге билгеләгән хәрби бурычларны намус һәм дәрәҗә белән хәл итәләр. Казан танк училищесын тәмамлаучылар гомуми җиңүгә үз өлешләрен кертәләр. Элек тә, бүген дә танклар сугыш кырында мөһим роль уйный», – диде Татарстан Рәисе.
Дмитрий Чернышенко Рөстәм Миңнехановны хуплады һәм танкларның Россия армиясенең төп хәрәкәт итүче көчләренең берсе булуын билгеләп үтте. «Мин сезне коллегаларым дип атый алам, чөнки танк хәрби кафедрасын тәмамладым. Сезне бүгенге бәйрәм белән котлауга ия булдым. Эшегезнең никадәр катлаулы һәм куркыныч икәнен беләм. Югары Баш командующий безнең алда куйган бурычларның никадәр тиз үтәләчәге сезгә бәйле», – диде вице-премьер.
Шулай ук ул училище курсантларын «Киләчәк уеннары» мультиспорт турниры кысаларында «Танклар дөньясы» ярышларының финалына чакырды.
Очрашуда шулай ук танк училищесын тәмамлаган Россия Герое Рәсим Баксиков катнашты. Кичә ул видеоэлемтә аша Владимир Путинга мөрәҗәгать итеп, Россия Президентыннан Казан танк училищесын 105 еллыгы белән котлавын сораган иде.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез