Татарстан Рәисе: «Тикшерү идарәсендә үз эшләренә бирелгән чын профессионаллар эшли»

Чара башланганчы Рөстәм Миңнеханов, РФ Тикшерү комитетының ТР буенча Тикшерү идарәсе җитәкчесе Валерий Липский һәм башкалар холлда урнашкан тематик күргәзмә (ТР Милли китапханәсе һәм ТР Милли музее тарафыннан тәкъдим ителә) белән таныштылар.

Рәсми өлеш 2025 елда ведомство ирешкән нәтиҗәләр турында фильм караудан башланды.

Сәламләү сүзе белән РФ Тикшерү комитетының ТР буенча Тикшерү идарәсе җитәкчесе Валерий Липский чыгыш ясады.

Татарстан Рәисе, РФ Тикшерү комитеты оешуга 15 ел тулуга багышланган тантаналы чарада катнашучыларны сәламләп, ассызыклаганча, бу еллар эчендә ведомство үзен законлылык һәм хокук тәртибенең ышанычлы гаранты итеп күрсәтте, башка көч оешмалары арасында лаеклы урын алды. «Сез ирешкән нәтиҗәләр Тикшерү комитеты оештыруның актуальлеген һәм аның кирәклеген раслый, – диде Рөстәм Миңнеханов. – Республиканың башка хокук саклау органнары белән нәтиҗәле хезмәттәшлек нәтиҗәсендә бик күп җинаятьләр, шул исәптән мөһим социаль әһәмияткә ия булган резонанслы җинаятьләр дә ачылды һәм тикшерелде. Сезнең эш Тикшерү комитетының тикшерү органнарына гына түгел, ә илнең бөтен хокук саклау системасына җәмәгатьчелек ышанычын арттырырга ярдәм итә».

Рөстәм Миңнеханов билгеләп үткәнчә, бүген ведомство бер урында тормый: җинаятьләрнең аерым төрләрен тикшерүгә махсуслашкан бүлекчәләр булдырылган, яңа технологияләр кертелә һәм кулланыла, киберҗинаятьләрнең төрле схемаларын да кертеп, яңа куркынычларга каршы тора алалар.

Моннан тыш, тикшерү идарәсе яшьләр белән актив тәрбияви һәм патриотик эш алып бара. Республиканың дүрт шәһәрендә 10 кадет сыйныфы булдырылды, аларның гомуми саны ике йөздән артык укучы. «Моның өчен сезгә аерым рәхмәт», – диде Рөстәм Миңнеханов, РФ Тикшерү комитетының ТР буенча Тикшерү идарәсе хезмәткәрләренә мөрәҗәгать итеп.

«Бүген Татарстан Республикасы буенча Тикшерү идарәсендә үз эшләренә бирелгән чын профессионаллар эшли. Хәзерге заман тикшерүенең куәтле нигезен салып кына калмыйча, яшь сменаны тәрбияләүдә актив катнашуын дәвам иткән тикшерү ветераннарына аерым рәхмәт сүзләрен җиткерәсем килә. Хөрмәтле коллегалар! Хөрмәтле хезмәттәшләр! Без сезнең киеренке, еш кына фидакарь хезмәтегезне югары бәялибез һәм һәрвакыт тиешле ярдәм күрсәтергә әзер», – диде Татарстан Рәисе. Ул шулай ук тикшерү идарәсе коллективы гражданнарның хокукларын һәм ирекләрен яклау, җинаятьчелеккә каршы көрәш, җәмәгать иминлеген һәм закон өстенлеген ныгыту эшендә куелган бурычларны югары дәрәҗәдә хәл итүне дәвам итәчәгенә ышаныч белдерде.

Рөстәм Миңнеханов барысына да һөнәрнең югары стандартларына тугрылыклы булулары һәм гаделлек өчен компромиссыз көрәшүләре өчен рәхмәт белдерде, Тикшерү идарәсе хезмәткәрләренә һәм аларның гаиләләренә нык сәламәтлек һәм иминлек теләде.

Аннары ведомствоның иң алдынгы хезмәткәрләрен Татарстан Республикасы дәүләт бүләкләре һәм Татарстан Республикасы Рәисе Рәхмәт хатлары тапшырылды.

БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!