Рөстәм Миңнеханов караучысыз калган этләр мәсьәләсен аерым контрольдә тотарга кушты

Бүген Татарстан Республикасы Хөкүмәте Йортында узган киңәшмәдә Татарстан Рәисе Рөстәм Миңнеханов Зеленодольск муниципаль районының Васильево бистәсендәге кичәге фаҗигане шәрехләде. Вакыйга кичен бистәгә керү юлында «Молодежный» тукталышында була - сукбай этләр көтүе 9 яшьлек кызга һөҗүм итә, нәтиҗәдә бала авыр хәлдә хастаханәдә ята.

"Безнең өчен бу - чираттагы сигнал, - диде Рөстәм Миңнеханов. – Күз алдына китерегез әле, ничек авыр - 9 яшьлек бала зыян күргән, аның имгәнүләре бар! Бу фаҗига. Аның әти-әнисе нинди хәлдә? Күршеләрнең хәле - үз балаңны ничек урамга җибәрергә?»

Рөстәм Миңнеханов искәрткәнчә, җинаять эше кузгатылган, тикшерү үткәрелә.

Зеленодольск муниципаль районы башлыгы Михаил Афанасьевка мөрәҗәгать итеп, Рөстәм Миңнеханов: "Бу синең белән безнең бурычыбыз – кешеләрнең иминлеген тәэмин итү. Һәм бу безнең барыбызга да кагыла!»

Татарстан Рәисе караучысыз калган этләр мәсьәләсен аерым контрольдә тотарга кушты.

"Бу галәмәт хәл! - диде ул.- Кыргый этләр кешеләргә һөҗүм итәләр. Һәм бернинди чаралар да күрелми. Моңа җитди карарга вакыт".

"Мин хайваннарга каршы түгел, - дип шәрехләде Рөстәм Миңнеханов. - Ләкин балаларга эт һөҗүм итсә, безнең өчен кем мөһимрәк: этме, әллә безнең кешеләрме?»

Рөстәм Миңнеханов үткән еллардагы мисалларны китерде, анда өлкән кешеләргә сукбай этләр һөҗүм иткән.

Хайваннарга да сак карарга кирәк, диде ул, ләкин менә шундый хәлләр рөхсәт ителми.

Рөстәм Миңнеханов муниципаль районнар башлыкларына, кешеләргә, бигрәк тә балаларга сукбай этләр һөҗүм итмәсен өчен, йортсыз хайваннарны контрольдә тотуны көчәйтергә кушты.

"Мондый хәлләр булмаска тиеш", - дип ассызыклады Рөстәм Миңнеханов һәм җаваплы ведомстволарга караучысыз калган хайваннарга бәйле вәзгыятьне контрольдә тотарга кушты. Ул билгеләп үткәнчә, вәзгыять бер мизгелдә генә үзгәрмәячәк – эш системалы булырга тиеш.

Киңәшмә барлык муниципаль районнар белән видеоконференцэлемтә режимында узды. Киңәшмәдә Татарстан Премьер-министры Алексей Песошин, ТР Дәүләт Советы Рәисе Фәрит Мөхәммәтшин катнашты.

/ТР Рәисе Матбугат хезмәте

БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!