Бүген Татарстан Республикасы Рәисе Рөстәм Миңнеханов Казанның тарихи үзәгендәге объектларны карады. Беренче объект Мәскәү ур., 2 адресы буенча урнашкан ЦУМ бинасы булды.
Рөстәм Миңнеханов һәм аны озата йөрүче затлар ЦУМ территориясен һәм бинасын карап чыктылар, яңа корпусның эш сыйфатын бәяләделәр.
Искәртәбез, территориядә ремонт һәм төзелеш эшләре алып барыла, биредә халыкның сәнгать һөнәрләрен, кәсепләрен һәм декоратив-гамәли сәнгатен торгызу, саклау, өйрәнү һәм үстерү үзәге урнашачак. Парковка, шул исәптән туризм автобуслары өчен дә планлаштырыла.
Моңа кадәр бу объект быелның июнендә Тарихи җирлекләрдә шәһәр төзелеше эшчәнлеге мәсьәләләре буенча ведомствоара комиссия утырышында каралган иде.
Бина янында куелган планшетларда Рөстәм Миңнехановка территрияне, җәмәгать киңлекләрен төзекләндерү проектын, эчке бизәлешне, кулланыла торган материалларны, дизайнны тәкъдир иттеләр. Яңартылган бинада холл, милли ризыклар зонасы (1 кат), уку блогы, динамик экспозицияләр зонасы һ.б. (икенче катта) урнашачак. Шулай ук тимерче алачыгы һәм пыяла өрү остаханәсен урнаштыру вариантлары тәкъдим ителде.
Проект турында «Казанны үстерү институты» МБУ директоры А.П. Горбунов, «Татинвестгражданпроект» ДУП генераль директоры А.А. Хөснетдинов һәм ЦУМ объекты кураторы Р.С. Тепавчевич сөйләде.
Татарстан Рәисе үз кисәтүләрен һәм тәкъдимнәрен әйтте.
«Иң мөһиме – монда килүчеләргә автобусларда килүче туристларга да, шәхсән килүчеләргә дә уңайлы булсын», – диде ул.
Икенче объект – Маяковский ур., 26 адресы буенча урнашкан «Сомов» бутик-отеле. Бу агач төзелеш сәнгате объекты, реестрга төбәк әһәмиятендәге мәдәни мирас объекты буларак кертелгән. Бина 1852 елда төзелгән һәм Казанның титуляр киңәшчесе, өяз судьясының улы Порфирий Степанович Сомовныкы булган.
Бинаны инвестор 2020 елда реставрацияләү өчен сатып алган. Реставрация 2021-2024 елларда башкарылган, биредә «Сомов» бутик-отеле урнашкан. 2024 елда объект «Казаныш» форумы кысаларында архитектура смотр-конкурсында «Иң яхшы реновация объекты» номинациясендә җиңүче булды.
Рөстәм Миңнеханов номерларны карап чыкты һәм реставраторларның биредәге элек-электән булган агач архитектура корылмаларын ничек саклап калуларын һәм заманча функцияләргә җайлаштыруларын югары бәяләде.
Аннары Волков урамындагы 53 нче йортта урнашкан торак комплексның планшетларында презентация булды. Күп фатирлы торак йорт проекты Beton архитектура студиясе тарафыннан эшләнгән. Объект тарихи төзелешкә кертелгән. Рөстәм Миңнехановка раслау өчен берничә вариант тәкъдим ителде. Элегрәк бу объект быелның июнендә Тарихи җирлекләрдә шәһәр төзелеше эшчәнлеге мәсьәләләре буенча ведомствоара комиссия утырышында каралган иде (урынга барып карарга карар кылынды). Проект турында архитектор Камилә Халитова сөйләде. Проект Волков 53не сыйфатлы реконструкцияләү шарты белән хупланды.
Аннары Рөстәм Миңнехановка Старообрядческая урамындагы торак йорт төзелеше проектын планшетларда күрсәттеләр. Тихомирнов һәм Старообрядческая урамнарыннан күренеш кадрлары күрсәтелде, вариантларның берсе хупланды, чөнки сыйфат ягыннан эшләп бетерелгән. Гомуми төзекләндерү территориясенә шулай ук иске обряд чиркәвенә тоташкан объект кертелергә тиеш.
Шулай ук Ульянов-Ленин урамы буйлап җәяүлеләр элемтәсе проектының яңа варианты турында сөйләделәр. Рәис ярдәмчесе Олеся Балтусова һәм «Казанны үстерү институты» МБУ эксперты Гөлнара Әскәрова аңлатмалар бирде. Проект алдагы эшләнмәләрне исәпкә алып хупланды.
Казанның тарихи үзәгендәге объектларны караганда Рөстәм Миңнехановны Татарстан Республикасы Рәисе ярдәмчесе Олеся Балтусова, Татарстан Республикасы төзелеш, архитектура һәм торак-коммуналь хуҗалык министры Марат Айзатуллин, Татарстан Республикасы мәдәният министры Ирада Әюпова, Казан шәһәре мэры Илсур Метшин озата йөрде.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез