Рөстәм Миңнеханов Кытайның Шэньчжэнь шәһәре вице-мэры белән очрашты

Шэньчжэнь - Кытай IT-индустриясе үзәге, илнең зурлыклары буенча гына түгел, икътисадый үсеш дәрәҗәсе буенча да иң эре мегаполисларының берсе. Шәһәр күп кенә техник гигантларның (Huawei, Tencent, ZTE) штаб-квартиралары урнашкан һәм Кытайның иң популяр туристик юнәлешләренең берсе булып тора.

Рөстәм Миңнеханов Шэньчжэньга беренче тапкыр 2011 елда, 26 нчы Бөтендөнья студентлар спорт уеннарын ачу тантанасында катнашканда килүен искә төшерде. Ул вакытта Казан эстафетаны кабул итте һәм 2013 елда чираттагы Универсиаданы уздырды. «Казан белән Шэньчжэньның 2012 елдан бирле тугандаш шәһәрләр булуын билгеләп үтүемә шатмын», – диде Рөстәм Миңнеханов.

Ул искәрткәнчә, узган ел нәтиҗәләре буенча Татарстанның Кытай белән тышкы сәүдә әйләнеше рекордлы булды һәм $3,3 млрд.тан артып китте. «Соңгы елларда сезнең ил безнең республика икътисадына төп чит ил инвесторы булды. Узган елда чит ил инвестицияләре структурасында Кытай инвестицияләре өлеше 80%тан артып китте», – дип игътибарны юнәлтте Республика Рәисе.

Ул Татарстан Кытай Халык Республикасы белән уртак инновацион һәм сәнәгать проектлары портфелен машина төзелешеннән алып IT-өлкәдә һәм энергетикада югары технологияләргә кадәр киңәйтә дип сөйләде.

Рөстәм Миңнеханов Шэньчжэнь делегациясен «РОСТКИ: Россия һәм Кытай – үзара файдалы хезмәттәшлек» халыкара форумында катнашырга чакырды, ул ике илнең дә рәсми һәм эшлекле даирәләре катнашында эшлекле багланышларны киңәйтүгә юнәлдерелгән.

Ло Хуанхао әфәнде Рөстәм Миңнехановны җылы сәламләде. «Сезнең белән очрашуга шатбыз. Сез инде берничә тапкыр Шэньчжэньда булдыгыз. Бүген сезнең катнашта Иннополис һәм Гуанмин арасында килешү имзаланды. Бу Кытай белән Россия арасындагы мөнәсәбәтләрне үстерү һәм ныгытуның яхшы билгесе», – дип ассызыклады вице-мэр.

Ул Шэньчжэньның соңгы яңа казанышлары турында сөйләде. Аерым алганда, узган ел нәтиҗәләре буенча икътисад үсеше темплары 5,8% тәшкил иткән, быелның 10 аенда - 5,5%. Бу Кытайның барлык шәһәрләре арасында иң яхшы күрсәткеч булып тора. Шэньчжэньның һәр бишенче кешесе – эшкуар, ә халыкның уртача яше 32,5 яшь.

«Без Татарстан белән элемтәләрне ныгытырга әзер. Аерым алганда, сезнең предприятиеләрне икътисадый һәм сәнәгать потенциалы белән танышу өчен шәһәребезгә килергә чакырабыз. Сезнең эшкуарларга иң отышлы хезмәтләр пакетын күрсәтергә әзер», – дип ышандырды вице-мэр.

Сүз уңаеннан, хәзерге вакытта Татарстанда «Нәтиҗәле конкурентлыкка сәләтле икътисад» илкүләм проекты гамәлгә ашырыла.

БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!