Утырыш «Технологик лидерлык һәм тотрыклы үсеш: нефть-газ тармагының киләчәге өчен инновацион алымнар һәм хәл ителешләр» темасына багышланды. Форумда катнашучыларга Россия Энергетика министры Сергей Цивилев видеомөрәҗәгать юллады. Бу хакта Республика Рәисенең матбугат хезмәте хәбәр итә.
Рөстәм Миңнеханов үз чыгышында республика тәҗрибәсен тәкъдим итте. Нефть, газ, химия комплексы - Татарстан икътисадының лидеры һәм нигезе, дип ассызыклады ул. 2025 елда республикада 34 млн 450 мең тонна нефть чыгарылган, ике эре объектта 23 млн 220 мең нефть эшкәртелгән. Эшкәртү тирәнлеге 99%тан артык. Шулай ук Татарстан — полиэтилен буенча эре җитештерүче - республика Россия базарының 26%ын алып тора. Синтетик каучуклар буенча - 44%. Йөк шиналары буенча - 60%. Ә Россиядә карбонат безнең республикада гына җитештерелә, диде Рөстәм Миңнеханов.
"Узган ел Татарстан Республикасы нефть, газ, химия комплексы предприятиеләре тарафыннан 2 трлн 870 млрд сумлык продукция җитештерелгән. Ә җитештерелгән продукциянең бөтен күләме - 6 трлн 35 млрд. Нефть-газ химиясе комплексы бездә җитештерелгән продукциянең яртысын диярлек тәшкил итә", - дип билгеләп үтте Татарстан Рәисе.
Аның сүзләренчә, бүген лидерлык барыннан да элек үз технологияләреңне булдыру, инновацияләр кертү һәм тотрыклы үсеш тәэмин итү сәләтен аңлата. Моның өчен Татарстанда югары уку йортларындагы алдынгы инженерлык мәктәпләре нигезендә бербөтен инженерлык экосистемасы даими рәвештә үсә. Алар яңа буын инженер кадрларын әзерләүнең төп драйверларына әверелде.
"Безнең алдынгы инженерлык мәктәпләрендә уртак белем бирү программалары гамәлгә ашырыла, заманча лабораторияләр төзелә, тармакның конкрет технологик бурычлары өчен кадрлар әзерләү алып барыла. Мондый алым безгә ышанычлы рәвештә алга барырга, нефть-газ өлкәсендә лидерлык позицияләрен саклап калырга һәм бөтен илнең технологик үсешенә саллы өлеш кертергә мөмкинлек бирә", - диде Татарстан Республикасы Рәисе.
Шулай ук республикада нефть, нефть химиясе һәм машина төзелеше компанияләре Иннополисның IT-эшкәртүчеләре белән актив хезмәттәшлек итә торган экосистема булдыру буенча эш дәвам итә. Бу нефть-газ сәнәгате өчен яңа илебез хәл ителешләрен булдырырга мөмкинлек бирә. Ышанам ки, нәкъ менә шундый партнерлык илнең технологик лидерлыгының нигезе булып тора, диде Рөстәм Миңнеханов.
Экологик, технологик һәм атом күзәтчелеге буенча федераль хезмәт (Ростехнадзор) җитәкчесе Александр Трембицкий Татарстанның сәнәгать иминлеге өлкәсендәге эшен югары бәяләде. Ул билгеләп үткәнчә, республикада бу мәсьәләгә зур игътибар бирелә. Ә аварияләр кимү динамикасы илдә иң яхшыларның берсе булып тора.
Утырыш барышында шулай ук нефть-газ өлкәсенең төрле аспектлары һәм технологияләре турында нотыклар тыңланды. Кооперацияләрне үстерү, ятмаларны эшкәртү һәм чимал базасын торгызу мәсьәләләренә кагылдылар.
БЕЗНЕҢ МАКС КАНАЛЫНА ЯЗЫЛЫГЫЗ!
Фикер өстәү
Фикерегез