Татарстан Рәисе Рөстәм Миңнеханов «Президент академиясенең Җәйге кампусы» XIII халыкара мәгариф форумының пленар сессиясендә катнашты. Чара «Зөя таулары» комплексы территориясендә узды. Быелның темасы - «Безнең заман каһарманнары".
РАНХиГС ректоры, «Россия – мөмкинлекләр иле» коммерциячел булмаган автоном оешмасы идарәсе рәисе Алексей Комиссаров республика җитәкчелегенә белем бирү форумына ярдәм итүләре һәм уңайлы эш өчен барлык шартлар тудырулары өчен рәхмәт белдерде. Ул билгеләп үткәнчә, быел форумда Россиянең төрле төбәкләреннән һәм дөньяның 15 иленнән 200гә якын студент катнаша.
Катнашучыларны сәламләп, Рөстәм Миңнеханов билгеләп үткәнчә, Җәйге кампус - студентлар уникаль белем һәм компетенцияләр ала торган нәтиҗәле мәйданчык. "Эшнең мондый формасы бик файдалы. Сезнең өчен генә түгел, безнең өчен дә. Без сездән күп нәрсәгә өйрәнәбез. Форум бик уңай нәтиҗәләр күрсәтә. Киләчәк - сезнең кулларда!" - дип мөрәҗәгать итте республика Рәисе студентларга.
Ул билгеләп үткәнчә, Татарстан үз яшьләре белән хаклы рәвештә горурлана һәм яшьләр проектларын тормышка ашыруга, яшь талантларга ярдәм итүгә, мәгариф системасын үстерүгә өстенлекле игътибар бирә: «Безнең өстенлекле бурыч - гражданнар тормышы өчен уңайлы шартлар тудыру. Моңа илкүләм проектлар, федераль һәм республика программалары юнәлдерелгән".
Рөстәм Миңнеханов ассызыклаганча, быелгы тема – «Безнең заман каһарманнары» - бик дөрес сайланган. 2025 ел - Бөек Җиңүнең 80 еллыгы һәм Россия Президенты тарафыннан игълан ителгән Ватанны саклаучылар елы.
"Бу бигрәк тә бүген, илебез үзенең суверенитетын һәм киләчәген яклаган шартларда актуаль", - диде Рөстәм Миңнеханов.
ТР Рәисе билгеләп үткәнчә, Татарстан сугышчылары МХО зонасында батырлык һәм каһарманлык күрсәтәләр, аларга һәм аларның гаиләләренә республика предприятиеләре һәм волонтерлык җәмәгатьчелеге зур ярдәм күрсәтә.
«Иң мөһиме - без патриот булырга тиеш. Үз югар ыуку йортының, шәһәренең, төбәгенең һәм, иң мөһиме, үз иленең патриотлары. Предприятиедә, медицинада, педагогика өлкәсендә һәм башка өлкәләрдә уңышка ирешкән һәркем каһарман була ала. Ата-аналарыбызны хөрмәт итәргә, туган телебезне, милли гореф-гадәтләребезне һәм мәдәниятебезне сакларга кирәк», - диде Рөстәм Миңнеханов.
Ул ассызыклаганча, Татарстанның беренче Президенты, Россиянең Хезмәт Герое Минтимер Шәймиев аның өчен һәрвакыт үрнәк булды һәм шулай булып кала да.
Әңгәмә барышында Татарстан Рәисе шулай ук илебезне изоляцияләү омтылышларының уңышка ирешмәвен билгеләп үтте. Казанда БРИКС саммиты уздырылуы моңа ачык дәлил булып тора. Анда 36 ил катнашты, шуларның 24е югары дәрәҗәдә тәкъдим ителгән иде, БМО Генераль сәркатибен дә кертеп, алты халыкара оешма җитәкчеләре дә катнашты.
"Бик күп илләр безнең ил белән хезмәттәшлек итәргә тели, шул исәптән ислам дөньясы дәүләтләре дә. Россия - ул держава! Киләчәктә дә шулай булыр", - дип белдерде Рөстәм Миңнеханов.
Быел Җәйге кампус 13-18 июльдә уза. Форум программасына лекцияләр, семинарлар, вебинарлар, мастер-класслар һәм команда эшләреннән торган белем бирү өлеше, шулай ук мәдәни-танышу һәм экскурсия чаралары керә.
Катнашучыларның команда эшенең йомгаклау проекты «Безнең заман каһарманнры» исемле документаль фильм булачак. Проектны әзерләү барышында һәр команда үзенә беркетелгән белем бирү программасы лекторы белән эшли.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез