Бүген Татарстан Республикасы Рәисе Рөстәм Миңнеханов «Россия энергетика атнасы» VIII халыкара форумында катнашты.
Форум Мәскәүдә 2025 елның 15-17 октябрендә уза. Россия энергетика атнасында 85 ил вәкиле катнаша: дәүләт эшлеклеләре, энергетика компанияләре лидерлары, эксперт һәм фәнни җәмәгатьчелек вәкилләре. Эшлекле программа 60тан артык чараны үз эченә ала.
РЭА - ягулык-энергетика комплексын үстерүнең, күп поляр дөньяда күп яклы энергетика хезмәттәшлеген үстерүнең актуаль мәсьәләләре буенча фикер алышу өчен төп халыкара мәйданчык.
2025 елгы форумның темасы - "Киләчәк энергетикасын бергә булдырып".
Форум кысаларында Рөстәм Миңнеханов «Казан дәүләт энергетика университеты» югары һөнәри белем бирү ФДБМУ һәм «Интер РАО - Электрогенерация» АҖ арасында килешүгә кул кую тантанасында катнашты. Документка Казан дәүләт энергетика университеты ректоры Э.Ю. Абдуллаҗанов һәм «Интер РАО - Электрогенерация» АҖ генераль директоры В.В. Светушков кул куйдылар.
Шулай ук Казан дәүләт энергетика университеты белән «Ышанычлы алмаш» хәйрия фонды арасында килешү имзаланды.
"Энергетика - теләсә нинди икътисадның нигезе ул, - диде Рөстәм Миңнеханов федераль ММЧ вәкилләренә биргән әңгәмәсендә. - Әгәр тотрыклы энергетика булмаса, бернинди икътисад та булмаячак". Журналистларның сорауларына җавап биреп, Рөстәм Миңнеханов билгеләп үткәнчә, форумда бик күп мөһим темалар яңгыраячак, шул исәптән төбәкләр өчен дә. «Безнең илнең бөтен дөнья өчен куәтле энергетика потенциалы бар", - диде ул.
Татарстан Рәисе Россия энергетика атнасының пленар утырышында катнашты, анда Россия Федерациясе Президенты Владимир Путин чыгыш ясады.
Сүз уңаеннан, хәзерге вакытта “Нәтиҗәле конкурентлыкка сәләтле икътисад” илкүләм проекты гамәлгә ашырыла.
БЕЗНЕҢ ТЕЛЕГРАМ КАНАЛГА ЯЗЫЛЫГЫЗ!
Фикер өстәү
Фикерегез