Рөстәм Миңнеханов Татарстан дәүләт хезмәте ветераннары белән очрашты

Рөстәм Миңнеханов дәүләт хезмәте ветераннарына республика хакына күпьеллык намуслы хезмәтләре өчен рәхмәт белдерде. "Без өлкән буынга зур хөрмәт белән карыйбыз. Сез үз хезмәтегез белән Татарстан үсешенә зур өлеш керттегез. Бүген сез безне кешеләргә чын күңелдән хезмәт итү үрнәге белән рухландырасыз», - диде Татарстан Рәисе. 

Ул билгеләп үткәнчә, республиканың һәр казанышы конкрет кешеләргә бәйле. Алар арасында Татарстанның Беренче Президенты, республиканың Дәүләт Киңәшчесе, Россиянең Хезмәт Герое Минтимер Шәймиев, ул киләсе елда үзенең 90 еллыгын билгеләп үтәчәк. Рөстәм Миңнеханов хәбәр иткәнчә, 2027 ел Татарстанда Минтимер Шәймиев елы дип игълан ителде.

Республика Рәисе билгеләп үткәнчә, барлык кыенлыкларга да карамастан, бүген Татарстан авырлыкларны лаеклы җиңеп чыга, икътисадның тотрыклылыгын күрсәтә, халыкның тормыш сыйфатын күтәрү буенча зур эш алып бара. Республика әһәмиятле халыкара вакыйгаларны кабул итә, эре проектларны гамәлгә ашыра. Шуларның берсе - Уникаль осталыкның яңа үзәге. Рөстәм Миңнеханов ассызыклаганча, бу уникаль проект, аның төп максаты - традицион һөнәрләрне саклап калу һәм үстерү, яшь осталарны өйрәтү.  

"Хөрмәтле ветераннар! Сезнең белән очрашуга без һәрвакыт шат. Актив гражданлык позициягез өчен рәхмәт сезгә. Сезгә нык сәламәтлек, озын гомер һәм күңел күтәренкелеге телим», - дип өстәде Татарстан Рәисе. 

Аннары Рөстәм Миңнеханов күпьеллык нәтиҗәле хезмәтләре һәм Татарстан Республикасының социаль-икътисадый потенциалын ныгытуга зур өлеш керткәннәре өчен дәүләт бүләкләре тапшырды.

БЕЗНЕҢ МАКС КАНАЛЫНА ЯЗЫЛЫГЫЗ!